Андижонда 20 килограммдан ортиқ марихуана сақлаган шахс қўлга олинди
Андижонда 20 килограммдан ортиқ марихуана сақлаган шахс ушланди
Андижон вилоятида “Қорадори-2026” тезкор-профилактик тадбирининг иккинчи босқичи доирасида гиёҳвандлик воситаларининг ноқонуний муомаласи билан боғлиқ бир нечта ҳолатлар фош этилди.
Олтинкўл туманида яшовчи, 1967-йилда туғилган шахснинг хонадонида 20 килограммдан ортиқ марихуана сақланаётгани маълум бўлди.
Яна бир тезкор тадбир давомида 1990-йилда Фарғона вилоятида туғилган шахс бошқарувидаги Оних Андижон шаҳри ҳудудида ЙПХ ходимлари томонидан тўхтатилди.
Автомобил текширилганда унинг салонидан 33 дона тропикамид номли кучли таъсир қилувчи дори воситаси ҳамда қарийб бир грамм гашиш топилди. Шунингдек, ушбу шахс билан таниш бўлган 1991-йилда туғилган шахснинг хонадонидан 26 дона, 1994-йилда туғилган шахснинг уйидан эса 55 дона тропикамид аниқланди.
Шу тариқа тезкор тадбир давомида жами 114 дона тропикамид ҳамда қарийб бир грамм гашишнинг ноқонуний муомалага киритилишининг олди олинди.
Булоқбоши туманининг Чақар маҳалласида эса шубҳали кўринган Нехиа-2 автомобили тўхтатилди. Автомобилда бўлган 1978-йилда туғилган шахснинг ёнидан икки бўлак, қора ва оқ рангли селлофан пакетларга ўралган, оғирлиги 470 грамм бўлган гашиш топилди.
Андижон туманида ўтказилган тезкор-қидирув тадбирида 1969-йилда туғилган шахс яшаш хонадонининг томорқасида тўққиз туп наша ўсимлигини экиб етиштиргани аниқланди. Ундан аниқланган қуритилган марихуананинг умумий оғирлиги 2 килограмм 214 граммни ташкил этди.