Андижонда қўшни давлатдан олиб кирилган гашиш, Фарғонада эса кўкнори сақлаётган шахслар аниқланди
Андижонда қўшни давлатдан олиб кирилган гашиш, Фарғонада эса кўкнори сақлаган шахслар фош этилди
Андижон ва Фарғона вилоятларида ўтказилган тезкор тадбирлар чоғида тақиқланган моддаларни сақлаб келган шахслар аниқланган. Бу ҳақда Давлат хавфсизлик хизмати маълум қилди.
Булоқбоши туманида ўтказилган тезкор тадбир вақтида ҳудудда ҳаракатланаётган Нехиа русумли автомобил тўхтатилиб, кўздан кечирилган. Унда йўловчи сифатида кетаётган икки нафар маҳаллий фуқаро (1978 ва 1985-йилларда туғилган) ёнидан 470 грамм гашиш моддаси топилган. Текширув жараёнида ушбу тақиқланган модда қўшни давлатдан контрабанда йўли билан олиб кирилгани аниқланган.
Фарғона вилоятида ўтказилган шунга ўхшаш тадбирда эса Фарғона туманида яшовчи, 1968-йилда туғилган фуқаронинг хонадони холислар иштирокида кўздан кечирилган. Натижада ушбу манзилда қуритилган ҳолатда сақланаётган 482 грамм кўкнори гиёҳвандлик воситаси ашёвий далил сифатида ҳужжатлаштириб олинган.
Ҳозирда ҳар икки ҳолат бўйича мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.