Андижонда қарийб 2 кг «гашиш» мусодара қилинди
Андижон вилоятининг Марҳамат туманида қарийб 2 килограмм «гашиш» моддасини қабул қилиб олган шахс ушланди. Ҳолат юзасидан жиноят иши қўзғатилиб, тергов ҳаракатлари олиб борилмоқда.
Андижонда 2 килограммга яқин гашиш моддаси олиб қўйилди.
Давлат хавфсизлик хизматининг Андижон вилояти бошқармаси ходимлари Божхона ва Ички ишлар органлари билан ҳамкорликда "Хавфсиз ва соғлом юрт" тезкор-профилактик тадбирлари доирасида Марҳамат туманида операция ўтказди.
Тадбир давомида 1993-йилда туғилган маҳаллий фуқаронинг ноқонуний фаолиятига чек қўйилди.
Маълумотларга кўра, аввалроқ наркокурерлар томонидан дала майдонидаги яширин жойга 1 кг 986 грамм гашиш моддаси қолдириб кетилган. Мазкур фуқаро гиёҳванд моддани ўз қариндоши орқали қабул қилиб олаётган вақтда қўлга олинган.
Тезкор тадбир давомида 1 кг 986 грамм гашиш моддаси ашёвий далил сифатида мусодара қилинди.
Ҳозирда ҳолат юзасидан жиноят иши қўзғатилиб, тергов ҳаракатлари олиб борилмоқда.