1600 дан ортиқ ном: ЕИ Россияга қарши энг йирик санксиялар бўйича келишиб олди
Европа Иттифоқи тез орада Россияга қарши санксиялар рўйхатига 1646 та янги номни киритади. Булар орасида сентабр ойида Украинанинг босиб олинган ҳудудларида ўтказилган Давлат Думаси сайловларида номзод бўлган 77 нафар депутат ҳам бор.
1600 дан ортиқ ном: ЕИ Россияга қарши энг йирик санксиялар бўйича келишувга келди
Бу қарор Европага қарши гибрид хуружлар хавотирли даражада кучайгани шароитида қабул қилинди, деб хабар берди Эуроневс.
7-октабр куни Брюсселда элчилар эришган келишув Москванинг Украинага кенг кўламли босқинини қўллаб-қувватлашда айбланаётган 743 нафар жисмоний шахс ва 826 та ташкилотга тегишли.
Элчилар бир неча ҳафталик муҳокамалар ва юридик текширувлардан кейин келишувга эришди. Номлар сони жуда кўплиги сабабли текширув жараёни айниқса қизғин кечди. Ташқи ишлар вазирлари Люксембургда йиғилгач, келишув расман тасдиқланади. Шундан сўнг санксия қўлланган шахслар ва ташкилотлар рўйхати оммага эълон қилинади.
Маълум қилинишича, санксиялар киришни тақиқлаш, активларни музлатиш ва молиявий ресурслар ажратишни ман этишни назарда тутади. Таъкидланишича, ЕИ аъзо давлатлари кетма-кет юз бераётган ҳамда айримлари Россия томонидан уюштирилгани айтилаётган гибрид хуружлар фонида бирдамлик кўрсатиш мақсадида келишувни тезроқ якунлашга интилган.
Германиянинг Лейпсиг аеропортидаги дрон билан боғлиқ ҳодисадан кейин янги санксиялар рўйхати устидаги ишлар аллақачон бошланган.
«Мамлакатлар санксиялар рўйхатига киритилиши керак бўлган номларни таклиф қилишда эркин. Бироқ якуний қарорни барибир ЕИ давлатлари қабул қилади», – деди ЕИ Олий вакили Кая Каллас.