Хитойга кириш ва чиқиш қоидалари кучайтирилади
Хитойга кириш ва чиқиш тартиблари кучайтирилади
Хитой 15-сентябрдан бошлаб фуқароларининг мамлакатдан чиқиши ва хорижликларнинг кириши учун янги қоидаларни жорий этади. Бу ўзгаришлар айрим ҳолатларда виза ёки кириш рухсатномасини олишни мураккаблаштириши мумкин.
31-июл куни қабул қилинган 19 моддадан иборат ушбу низом хорижга парвозлар хавфсизлигини таъминлаш, мамлакатдан чиқиш ва кириш бўйича аризаларга қўйиладиган талабларни аниқлаштириш ҳамда воситачилик хизматларини тартибга солишни назарда тутади.
**Чиқиш қоидалари**
Хитой фуқаролари мамлакатни тарк этиш учун топширадиган аризада сафар сабабини қонуний ва аниқ кўрсатиши, шунингдек, текширув жараёнида ҳамкорлик қилиши шарт. Таклифнома юборган ташкилот ёки шахс тақдим этилган маълумотларнинг ҳаққонийлиги учун жавобгар бўлади. Агар ёлғон ҳужжатлар ёки нотўғри маълумотлар тақдим этилса, иммиграция органлари сафар ҳужжатларини беришни рад этиши ёки мамлакатдан чиқишни тақиқлаши мумкин.
Бундан ташқари, Хитой расмийлари уруш, қуролли можаро, табиий офат ёки юқумли касалликлар авж олган ҳудудларга йўл олаётган фуқароларни огоҳлантириб, бундай сафарлардан воз кечишни тавсия қилади.
**Кириш қоидалари**
Хитой визаси, мамлакатга кириш, қолиш ёки яшаш рухсатномасини олиш учун ариза топшираётган хорижликлар ҳам фақат тўғри ва ишончли маълумот тақдим этиши шарт. Ёлғон маълумот берган, чегара тартибини бузганлик учун жиноий жавобгарликка тортилган ёки ҳужжатларни қалбакилаштиргани учун маъмурий жазога тортилган шахсларга Хитойга кириш рад этилиши мумкин.
Шунингдек, иммиграция, виза органлари ёки Хитой қонунчилигига мувофиқ чеклов қўлланган чет эл фуқароларининг мамлакатга кириши ҳам чекланади.
**Агентликларга қўйиладиган талаблар**
Янги қоидалар мамлакатдан чиқиш ва кириш бўйича воситачилик хизматларини кўрсатувчи агентликлар фаолиятини ҳам тартибга солади.
Пулли маслаҳат бериш, ҳужжатларни расмийлаштиришда ёрдам кўрсатиш ва бошқа процессуал хизматлар билан шуғулланувчи агентликлар ташкил этилганидан кейин 15 кун ичида маҳаллий иммиграция идорасида рўйхатдан ўтиши шарт. Фаолият юритаётган агентликлар эса низом кучга кирганидан сўнг 90 кун ичида рўйхатдан ўтишни якунлаши лозим.
Агентликлар ёлғон маълумот тақдим этиши, бўрттирилган ёки чалғитувчи реклама тарқатиши, сохта ҳужжатлар тайёрлаши ёки бунга кўмаклашиши, шунингдек, мижозларга виза, яшаш рухсатномаси, паспорт ва бошқа ҳужжатларни ноқонуний йўл билан олишда ёрдам бериши тақиқланади.
Маълумот учун, 2025-йил 1-июндан бошлаб Ўзбекистон ва Хитой фуқаролари икки давлат ҳудудига 30 кунгача визасиз кириши, ундан чиқиши ва транзит ўтиши мумкин. Бироқ бу тартиб меҳнат фаолияти, ўқиш ва медиа фаолияти билан шуғулланишга амал қилмайди.