АҚШ виза гарови дастурини доимий қилиб, миқдорини 20 минг долларгача оширади
АҚШ 3-августдан бошлаб айрим мамлакатлар фуқароларига туристик ва бизнес визалари беришда 20 минг долларгача гаров талаб қилиш тартибини доимий равишда жорий этади. Бу ҳақда Реутерс агентлиги АҚШ Давлат департаментининг янгиланган қоидаларига таяниб хабар берди.
Янги тартиб Б-1 (бизнес) ва Б-2 (туризм) визаларига нисбатан қўлланилади. Хабарда айтилишича, консуллик ходими аризачига виза бериш шарти сифатида 20 минг долларгача гаров тўлаш мажбуриятини белгилаши мумкин. Бу қарор ҳар бир ариза бўйича консуллик ходимининг шахсий қарори асосида қабул қилинади.
Гаров виза учун йиғим ҳисобланмайди. Агар виза эгаси АҚШда рухсат этилган муддатдан ортиқ қолмаса ва белгиланган тартибда мамлакатни тарк эца, пул қайтарилади. Қоидалар бузилган тақдирда эса гаров давлат фойдасига ўтказилиши мумкин.
АҚШ ушбу дастурни 2025-йил август ойида 12 ойлик синов тариқасида жорий этган эди. Дастлаб консулликлар аризачилардан 5 минг, 10 минг ёки 15 минг доллар миқдорида гаров талаб қилиш ҳуқуқига эга бўлган. Доимий тартибда эса энг юқори миқдор 20 минг долларгача оширилди, 5 минг долларлик энг паст тоифа бекор қилинди.
Дастур 50 та давлат фуқароларига тааллуқли бўлиб, уларнинг 30 таси Африка давлатларидир. Марказий Осиёдан Қирғизистон, Тожикистон ва Туркманистон рўйхатга киритилган. Ўзбекистон бу рўйхатда йўқ. Давлат департаменти рўйхатни кейинчалик кенгайтириш ҳуқуқини сақлаб қолган.
АҚШ расмийларининг таъкидлашича, бу тартиб мамлакатга вақтинча кириб, рухсат этилган муддатдан ортиқ қолиб кетиш ҳолатларини камайтиришга қаратилган. Синов дастури давомида гаров татбиқ этилган давлатлар фуқаролари орасида бундай қоидабузарликлар кескин камайган.
Давлат департаменти дастлаб гаров талаби тахминан 2 минг нафар аризачига қўлланишини кутган эди. Амалда эса қарийб 20 минг аризачига гаров тўлаш шарти қўйилган ва уларнинг деярли ярми пулни тўламасликни танлаган. Натижада рўйхатга киритилган давлатлар фуқароларига Б-1 ва Б-2 визаларини бериш ҳажми 83 фоизга камайган.
Янги қоида АҚШда миграция назорати кучайтирилаётган бир пайтда қабул қилинди. Реутерс маълумотларига кўра, АҚШ Иммиграция ва божхона полицияси сўнгги ҳафталарда аеропортларда миграция мақоми бузилган хорижликларни ушлаш амалиётини кенгайтирган. Улар орасида Америка фуқароларининг турмуш ўртоқлари, тадқиқотчилар ва АҚШ ичидаги рейсларга чиқмоқчи бўлган шахслар ҳам бор.
АҚШ Ички хавфсизлик вазирлиги мамлакатда қонунга зид равишда яшаётган хорижликлар самолётларда эркин ҳаракатлана олмаслиги, фақат АҚШни ихтиёрий тарк этиш мақсадида парвоз қилиши мумкинлигини билдирган. Ҳуқуқ ҳимоячилари эса аеропортлардаги ушлашлар қонуний мақомини расмийлаштириш жараёнида бўлган шахсларга ҳам таъсир қилаётганини айтмоқда.