Угандалик футболчи босқинчилар ҳужуми оқибатида ҳалок бўлди

Угандалик футболчи Девид Овори талончилик ҳужуми қурбони бўлди

Уганданинг энг кўп совринли футбол клуби — “Вилла”нинг сардори Девид Овори Кампала шаҳридаги уйига яқин жойда содир бўлган ҳужум натижасида вафот этди. Бу хабар ББС нашри томонидан маълум қилинди.

Полиция хабарига кўра, жиноятчиларнинг асосий мақсади футболчининг мобил телефони ва бошқа шахсий буюмларини тортиб олиш бўлган. 27 ёшли Овори талончиларга қаршилик кўрсатишга уринган ва шу сабабли жиддий жароҳат олган. Гувоҳларнинг сўзларига кўра, ҳужумчилар футболчини тош билан уриб ўлдирган ва воқеа жойидан қочиб кетган. Ҳужумдан сўнг Овори аввалига энг яқин шифохонага олиб борилган, кейинроқ эса хусусий тиббиёт муассасасига ўтказилган. Бироқ, олган оғир тан жароҳатлари туфайли у эртаси куни ҳаётдан кўз юмган.

Уганда футбол федерацияси (ФУФА) ушбу фожиали воқеага муносабат билдириб, Оворини “нафақат майдонда, балки ундан ташқарида ҳам чинакам етакчи” деб таърифлади.

Овори ўз фаолиятининг катта қисмини ватанида ўтказган. Шунингдек, у Швеция ва Испаниянинг қуйи дивизион клубларида ҳам ўйнаган. Футболчи Уганда ёшлар терма жамоаси таркибида майдонга тушган, шунингдек, 2021-йилги Африка Миллатлар Кубоги саралаш босқичида асосий терма жамоа қайдномасига киритилган, аммо ўйинларда иштирок этмаган эди.