Таиландда футболчи ўйин пайтида яшин уришидан вафот этди (видео)

**Таиландда футболчи ўйин вақтида яшин уриши натижасида вафот этди**

Таиланднинг Сунгай Голок шаҳридаги Сантипҳап стадионида 4-август куни футбол ўйини чоғида фожиали ҳодиса юз берди. Майдонга яшин тушиши оқибатида 24 ёшли футболчи Софван Авае ҳаётдан кўз юмди, яна 12 нафар ўйинчи жароҳат олди. Бу ҳақда Тҳе Индепендент нашри хабар берди.

Полиция бошлиғи Тун Сирикҳунтнинг сўзларига кўра, шифокорлар футболчининг ҳаётини сақлаб қолиш учун барча чораларни кўрган, бироқ уринишлар зое кетган. Ижтимоий тармоқларда тарқалган видеода чақмоқнинг майдондаги бир нечта футболчи яқинига урилгани ва кучли овоз эшитилгани акс этган.

Қора ва оқ чизиқли формада бўлган жамоадошлари дарҳол унга ёрдамга шошилган. Улар футболчини орқасига ўгириб, биринчи ёрдам кўрсатишга ва уни ҳушига келтиришга ҳаракат қилган. Полициянинг маълумотларига кўра, жароҳат олган 12 нафар футболчи шифохонага етказилган. Уларнинг орасида бир нафар Малайзия фуқароси ҳам бор. Ўйин ҳаваскорлар ҳамда Таиланд ва Малайзия жамоалари иштирок этадиган маҳаллий Голок ФА Суп турнири доирасида ўтказилаётган эди.

Софван Авае САМСОЛЦ жамоасида қанот ҳужумчиси сифатида ўйнаган. У яқиндагина Таиланднинг Яла клуби билан шартнома имзолаган эди. Яла клуби футболчининг оиласига ҳамдардлик билдирди. Клуб баёнотида шундай дейилади: “Янги ўйинчимиз Софван Аваенинг оиласига ва яқинларига чуқур ҳамдардлик билдирамиз”.

Таиландда чақмоқ уриши билан боғлиқ ўлим ҳолатлари тез-тез учраб туради. Касалликларни назорат қилиш департаменти маълумотларига кўра, 2020-йилдан 2024-йилгача мамлакат бўйлаб камида 283 кишини чақмоқ урган. Уларнинг кўпчилиги воқеа жойида ҳалок бўлган. Бундан олдин Бангладешда 27-апрел куни яшин уриши оқибатида 14 киши ҳалок бўлгани ҳақида хабар берилганди.