Шотландиядаги Ҳамдўстлик ўйинларидан сўнг Уганда ва Покистон боксчилари ғойиб бўлди

Шотландиядаги Ҳамдўстлик ўйинларидан сўнг Уганда ва Покистон боксчилари ғойиб бўлди

Шотландия полицияси Глазгода бўлиб ўтган Ҳамдўстлик ўйинларидан кейин ўз ватанларига қайтмаган хорижлик спортчилар юзасидан тергов ишларини бошлади. ОАВ хабарларига кўра, йўқолган спортчилар Уганда ва Покистон бокс терма жамоалари аъзоларидир.

4-август, сешанба куни кечқурун Шотландия полицияси вакили бу борада расмий баёнот берди:

“Полицияга бир нечта спортчининг бедарак йўқолгани ҳақида хабарлар келиб тушди. Ҳозирда ҳолатни ўрганиш бўйича суриштирув ишлари олиб борилмоқда ва Буюк Британия Ички ишлар вазирлиги билан ҳамкорлик йўлга қўйилган”.

Уганданинг НБС Спорт нашри хабарига кўра, мамлакатнинг олти кишилик бокс терма жамоасининг тўрт нафар аъзоси жамоанинг қайтиш рейсидан олдин ғойиб бўлган. Улардан бири телеканалга ўзининг бошпана сўраш ниятида эканини маълум қилган.

Шунингдек, Пакистан Тодай нашрининг ёзишича, покистонлик боксчилардан бири ҳам ватанига қайтувчи самолётга чиқмаган.

Ҳамдўстлик ўйинларидан сўнг спортчиларнинг йўқолиб қолиши билан боғлиқ ҳолатлар сўнгги йилларда тез-тез учраб туради. Эслатиб ўтамиз, 2014-йилги Глазго ўйинларидан бери ушбу нуфузли мусобақалар асосан Австралия ёки Британияда ўтказиб келинмоқда.

Масалан, 2018-йилда Австралиянинг Голд-Кост шаҳрида бўлиб ўтган ўйинлардан сўнг ҳам шундай ҳолат кузатилган. Мусобақа якунланганидан бир ой ўтиб ҳам расмийлар 50 нафар спортчи ва делегация аъзоларини қидираётган эди, яна 190 киши эса бошпана сўраб расман мурожаат қилган.

Маълумот ўрнида айтиш жоизки, Глазгода 11 кун давом этган жорий йилги Ҳамдўстлик ўйинларида дунёнинг 74 та давлатидан келган 3000 га яқин спортчи иштирок этди.