Тошкентда автомобилларни эвакуация қилиш учун тўловнинг энг юқори миқдори белгиланди
Тошкент ҳокими қарори билан автомобиллар эвакуацияси учун тўловнинг энг юқори миқдори белгиланди. Ҳозир эвакуация хизматларини турли компаниялар кўрсатади, тарифлар эса тартибга солинмаган. Аввалроқ ҳоким 120 та эвакуатор харид қилиниши, эвакуация ва сақлашнинг янги тизими жорий этилишини айтганди.
Тошкент шаҳар ҳокимининг қарори билан автомобилларни эвакуация қилиш ва жарима майдончасида сақлаш хизматлари учун максимал тўлов миқдорлари белгиланди.
Ҳозирда автомобилларни эвакуация қилиш хизматларини бир қатор хусусий компаниялар тақдим этмоқда. Бунгача бу хизматлар учун тарифлар шаҳар миқёсида тартибга солинмаган эди. Июн ойи бошида пойтахт ҳокими Шавкат Умурзаков журналистларга, жумладан, Газета мухбирига, Тошкент учун 120 та эвакуатор сотиб олиш ва Йўл ҳаракати қоидаларини бузган ҳайдовчиларнинг автомобилларини эвакуация қилиш ҳамда сақлашнинг янги, ягона тизимини жорий этиш режалари ҳақида маълумот берган эди.
Тошкент шаҳрида йўл ҳаракатини ташкил этиш маркази (ЙҲТЕМ) хабарига кўра, ушбу қарор "йўлаклар ва пиёдалар ҳудудлари одамлар учун эркин бўлиши лозим бўлган қулай, хавфсиз ва тартибли шаҳар муҳитини яратиш бўйича олиб борилаётган изчил ишларнинг бир қисмидир".
Ҳужжатга мувофиқ, автомобилни махсус транспорт воситасида эвакуация қилиш ва ташишнинг ҳар бир километри учун базавий ҳисоблаш миқдорининг (БҲМ) 20 фоизи, автомобилни сақлаш учун эса ҳар бир суткага БҲМнинг 20 фоизи миқдорида ҳақ ундирилади.
Бунда автомобилни жарима майдончасига эвакуация қилишнинг умумий қиймати БҲМнинг 4 бараваридан ошмаслиги керак.
"Ягона чекланган тарифларнинг жорий этилиши тизимни янада тушунарли ва шаффоф қилишга, фуқароларни асоссиз ҳисоб-китоблардан ҳимоялашга ва ортиқча тўловларга йўл қўймасликка имкон беради", — дейилади ЙҲТЕМ хабарида.
"Автомобиллар пиёдалар йўлакларини, ўтиш жойларини ва бошқа жамоат жойларини тўсиб қўймаслиги лозим. Қулай шаҳар ҳаракатнинг барча иштирокчиларига ўзаро ҳурматдан бошланади. Йўлаклар — пиёдаларга, йўллар — транспортга, қоидалар эса барча учун ягона ва тушунарли бўлиши шарт", — дея қўшимча қилди марказ.