Норвегияда она ўғлига ғайриоддий исм қўйгани учун қамалди

Норвегияда кўп болали она ўғлига ғайриоддий исм қўйгани учун қамоқ жазосига ҳукм қилинди. Бу ҳақда “РИА Новости” хабар берди.

Кирсти Ларсен исмли аёл ўн учинчи фарзанди туғилишидан олдин туш кўрган. Тушида бир овоз унга туғилажак ўғлини Бриж (инглизчадан “кўприк”) деб аташни буюрган. Шундан сўнг аёл бу исмнинг ибронийча муқобили – Гешер исмини танлашга қарор қилган.

Бироқ Норвегия ҳукумати бу исмга рухсат бермаган. Расмийларнинг фикрича, бу исм жуда “бегона” бўлиб, мамлакат қонунларига кўра боланинг келажакдаги ҳаётига салбий таъсир кўрсатиши мумкин.

Аёл ўз қароридан қайтмаган ва судга мурожаат қилган, аммо унинг уриниши муваффақияциз якунланган. Суд аёлга тахминан 1600 крона (168 доллар) миқдорида жарима солган, аммо у бу суммани тўлашдан бош тортган.

“Агар бу жаримани тўлаганимизда, айбимиз борлигини тан олган бўлардик”, деган аёл.

Жарима тўлашдан бош тортгани учун унинг жазоси икки кунлик қамоқ билан алмаштирилган. Маълумот учун, Норвегияда исм бериш бўйича қонун 1800-йилларда қабул қилинган. Бу қонун боланинг келажагига зарар етказиши мумкин бўлган ёки ноқулай деб топилган исмларни рад этишга рухсат беради.

Аввалроқ хитойлик эркак чумоли сабаб бир йилга қамалгани ҳақида хабар берилганди. У Кения судида контрабандада айбланиб, қарийб 8 минг доллар жаримага ҳам тортилган.