Нетаняхунинг ўлган акасига Угандада ҳайкал қўйилди
Угандада Исроил бош вазири Бинямин Нетаняхунинг 1976-йилда самолётдаги гаровга олинганларни қутқариш операцияси чоғида ҳалок бўлган акаси Ёнатан Нетаняхуга ҳайкал ўрнатилди. Бу ҳақда АБС Невс хабар берди.
Ёдгорликнинг очилиш маросими 1-август куни Уганда қуролли кучлари раҳбари генерал Мухоози Каинеругаба бощилигида бўлиб ўтди. Ҳайкалда Ёнатан Нетаняху автомат ушлаб турган ҳолатда тасвирланган. Каинеругаба ушбу ҳайкални "аскарнинг жасоратига ҳурмат бажо келтириш" мақсадида буюртма қилганини маълум қилди. Маросимда исроилликлар, жумладан, Угандада фаолият юритувчи тадбиркор Барак Орланд ҳам иштирок этди.
Каинеругаба Уганда президенти Ёвери Мусевенининг тўнғич фарзанди ва унинг эҳтимолий вориси ҳисобланади. Ҳайкал Энтеббе шаҳридаги аеропорт терминали ташқарисида жойлашган. Айнан шу ерда подполковник Ёнатан Нетаняху Аир Франсе самолётида гаровга олинган 106 нафар йўловчини қутқариш миссиясида Исроил махсус кучларига бощилик қилаётганида ўқ тегиши оқибатида ҳалок бўлган эди.
Тўрт нафар шахс самолётни олиб қочиб, ўнлаб исроиллик йўловчиларни бошқалардан ажратиб олган ва агар Исроил ўнлаб фаластинлик маҳбусларни озод қилмаса, уларни ўлдириш билан таҳдид қилган эди.
Махсус кучлар 1976-йил 3-июл куни аеропортга бостириб кирган. Отишма чоғида ҳалок бўлган уч кишидан ташқари барча гаровдагилар қутқарилган. Бир соатдан камроқ вақт давом этган операцияда ўнлаб Уганда ҳарбийлари ҳам ҳалок бўлган. Ўша пайтда Исроил билан алоқаларни узган Уганда президенти Иди Амин Фаластин мустақиллиги тарафдори бўлган. Амалдаги президент Ёвери Мусевени ҳам Исроил—Фаластин низосини ҳал этишда "икки давлат" ечимини қўллаб-қувватлаб келмоқда.