Жавоҳир Синдаров Сент Луисдаги иккинчи ўриндан сўнг Гранд Чесс Тоур финалига яқинлашди

Жавоҳир Синдаров Сент-Луисдаги иккинчи ўрин билан Гранд Чесс Тоур финалига яқинлашди.

Ўзбекистонлик гроссмейстер Жавоҳир Синдаров Гранд Чесс Тоур 2026 элит турнирлар сериясининг тўртинчи босқичи бўлган Саинт Лоуис Рапид & Блитз мусобақасида иккинчи ўринни эгаллади. У ҳам рапид, ҳам блицда иккинчи бўлиб, жами 22 очко тўплади.

2-6-август кунлари бўлиб ўтган турнирда 9 та рапид ва 18 та блиц партияси ўйналди. Рапидда ғалаба учун икки очко, дуранг учун бир очко берилди, блицда эса ғалаба учун бир очко ва дуранг учун ярим очко берилди. Босқичнинг умумий мукофот жамғармаси 200 минг долларни ташкил этди.

**Фото:** Леннарт Оотес / Гранд Чесс Тоур

Рапиднинг тўққиз тури якунларига кўра, Синдаров 11 очко билан иккинчи ўринни эгаллади. Ҳиндистонлик Рамешбабу Прагнанандҳа 12 очко, АҚШ вакили Уесли Со эса 10 очко жамғарган.

Синдаровнинг рапиддаги перформанси 2739 ни ташкил этди. Турнирнинг якуний жадвалига кўра, унинг ушбу йўналишдаги рейтинги босқич олдидан 2730 эди.

Блиц баҳслари бошланишидан олдин ўзбекистонлик шахматчи пешқадамдан атиги бир очко ортда қолаётганди.

Блицнинг дастлабки тўққиз партиясида Синдаров 5,5 очко тўплаб, иккинчи ўринни сақлаб қолди. Тўртинчи турдан олтинчи тургача бўлган оралиқ у учун айниқса муваффақиятли кечди ва у кетма-кет учта ғалабага эришди – Фабиано Каруана, Эвондер Лян ва Ленер Домингес устидан зафар қучди.

Блицнинг биринчи кунидаги энг муҳим партиялардан бири Прагнанандҳага қарши кечди. Синдаров қўшимча пиёдани қўлга киритди ва Chess.com баҳосига кўра ғалабали позицияга эга бўлди, бироқ пиёдалар якунида ноаниқликка йўл қўйди, шундан сўнг рақиблар дурангга келишди. Агар у ғалаба қозонганида, пешқадамдан фарқни ярим очкогача қисқартирган бўларди.

“Ўйиннинг ҳал қилувчи палласида деярли исталган юриш билан ғалаба қозонаётганимни кўрган эдим”, – деб тушунтирди кейинроқ Синдаров партиянинг ҳал қилувчи палласидаги танловини изоҳлаб.

Блицнинг биринчи даврасидан кейин умумий ҳисобда Прагнанандҳанинг 18 очкоси, Синдаровнинг 16,5 очкоси ва Сонинг 15 очкоси бор эди.

**Фото:** Леннарт Оотес / Гранд Чесс Тоур

Иккинчи куни Синдаров 9 та имкониятдан яна 5,5 очко тўплади. Левон Аронян билан дуранг ўйнаганидан сўнг у кетма-кет Ёрден ван Форест ва Винсент Каймерни мағлуб этди. Шундан сўнг Каруанадан мағлубиятга учради, бироқ кейинроқ ўзбекистонлик шахматчи Аниш Гирини мағлуб этди.

Якун олдидан Прагнанандҳа билан фарқ айрим пайтларда ярим очкогача қисқарди.

Блицнинг 17-турида пешқадамлар ўзаро тўқнаш келди. Синдаров қўшимча пиёдага эга эди, аммо Прагнанандҳа позицияни сақлаб қолди. Дуранг натижа ҳиндистонлик шахматчига мусобақа тугашига бир тур қолганида турнирда ғолибликни таъминлади.

Сўнгги турда Синдаров Уесли Со билан дуранг ўйнади.

Блицнинг барча 18 та партияси якунларига кўра, Прагнанандҳа 11,5 очко, Синдаров 11 очко, Со 10,5 очко ва Аронян 10 очко жамғарди.

Ўзбекистонлик шахматчи блицда бешта ғалабага эришди, иккита мағлубиятга учради ва 11 та дуранг қайд этди. Унинг перформанси 2749 ни ташкил этди – бу Прагнанандҳаникидан (2771) кейин турнирдаги энг яхши иккинчи кўрсаткичдир. Мусобақа давомида Синдаровнинг блицдаги рейтинги тўққиз пунктга ўсди.

Умумий ҳисобда Прагнанандҳа 23,5 очко жамғарди: рапидда 12 ва блицда 11,5 очко. Синдаров 22 очко (11+11) билан иккинчи ўринни эгаллади. Учинчи ўринни 20,5 очко билан Уесли Со, тўртинчи ўринни эса 19 очко билан Левон Аронян банд қилди.

Кейинги ўринларда Ленер Домингес, Фабиано Каруана ва Ёрден ван Форест – ҳар бири 17 очкодан – бор. Аниш Гири 15,5 очко, Винсент Каймер 14,5 очко, Эвондер Лян эса 14 очко тўплади.

Ғолиб 50 минг доллар, Синдаров 40 минг доллар, Со 30 минг доллар, Аронян эса 20 минг доллар мукофот олди.

Прагнанандҳа учун бу ғалаба фаолиятидаги Гранд Чесс Тоур сериясининг алоҳида босқичидаги иккинчи ғолиблик бўлди. У илк бор 2025-йил май ойида Бухарестдаги босқичда ғолиб чиққан эди.

Турнирдан сўнг Прагнанандҳа ўзбекистонлик вакил билан кечган курашни алоҳида таъкидлаб ўтди.

“Якуний ҳисобга қаралса, ҳаммаси силлиқ кўринади, аммо ундай эмасди. Ҳаммаси жуда ақл бовар қилмас тарзда кечди. Жавоҳирга ҳурмат кўрсатиш керак – у охиригача курашди”, – деди ҳиндистонлик гроссмейстер.

Синдаровнинг ўзи Каруанадан учраган мағлубиятдан тегишли хулосалар чиқарганини ва умуман олганда ўз ўйинидан мамнун қолганини айтди.

“Баъзан яхши ўйнашнинг ўзи етарли эмас. Яна омад ҳам керак”, – деди у мусобақа якунлари бўйича.

Сент-Луисдаги натижа Жавоҳир Синдаровнинг Гранд Чесс Тоур финалига чиқиш йўлидаги кураши учун алоҳида аҳамиятга эга.

Иккинчи ўрин учун у сериянинг 10 очкосини қўлга киритди ва тўртта босқичдан сўнг 20,5 очко билан умумий ҳисобнинг бешинчи қаторига кўтарилди.

Фабиано Каруана 25 очко билан пешқадамлик қилмоқда. Ундан кейинги ўринларни Прагнанандҳа (24,5) ва Уесли Со (23,5) эгаллаб турибди. Финалга чиқувчи сўнгги – тўртинчи ўринни эса 21 очкога эга Винсент Каймер банд этган.

Шу тариқа, Синдаровни финалга чиқиш зонасидан атиги 0,5 очко ажратиб турибди.

Гранд Чесс Тоур босқичидаги ғалаба учун 13 очко, иккинчи ўрин учун 10 очко, учинчи ўрин учун эса 8 очко берилади. Шундан сўнг иштирокчилар 7, 6, 5, 4, 3, 2 ва 1 очкодан олади. Ўринлар бўлишилганда, ўша позициялар учун мўлжалланган баллар қўшилади ва шахматчилар ўртасида тақсимланади.

Гранд Чесс Тоур финалига умумий ҳисобдаги энг яхши тўрт нафар шахматчи чиқади. Рейтингнинг биринчи рақами тўртинчи, иккинчиси эса учинчи рақамли шахматчи билан баҳс олиб боради.

Сент-Луисда 10-20-август кунлари классик шахмат бўйича ўтказиладиган ва Гранд Чесс Тоур мунтазам қисмининг бешинчи, сўнгги босқичи ҳисобланадиган Синкфилд кубоги ҳал қилувчи аҳамиятга эга бўлади.

Синдаров ўз дебют ГСТ мавсумида серия финалига чиқиши учун турнир якунларига кўра умумий ҳисобда Каймерни ортда қолдириши керак.

Гранд Чесс Тоур финалининг ўзи 22-27-август кунлари Сент-Луис шаҳрида ўтиши режалаштирилган. Унинг мукофот жамғармаси 450 минг долларни ташкил этади, шундан ғолиб 200 минг долларни қўлга киритади.