Жавоҳир Синдаров Сент Луисдаги рапидни иккинчи ўринда якунлади

Жавоҳир Синдаров Сент-Луисдаги рапид шахмат мусобақасида иккинчи ўринни эгаллади.

Ўзбекистонлик гроссмейстер Жавоҳир Синдаров нуфузли Гранд Чесс Тоур сериясининг якуний босқичи – Саинт Лоуис Рапид & Блитз 2026 турнирининг рапид баҳсларида иккинчи ўринни қўлга киритди.

Тўққиз турдан сўнг Ўзбекистон вакили 11 очко тўплаб, пешқадам ҳиндистонлик Рамешбабу Прагнанандхадан атиги бир очко ортда қолди. Учинчи ўринни 10 очко билан америкалик Уесли Со эгаллади.

Рапидда ғалаба учун икки очко, дуранг учун бир очко берилди. Синдаров иккита ғалабани қўлга киритди ва етти марта дуранг ўйнаб, барча тўққизта партияни мағлубияциз якунлади.

**Биринчи кун:**

Иштирокчилар биринчи куни учта тур ўтказишди. Синдаров мусобақани Аниш Гирига қарши дуранг билан бошлади. Биринчи партияда ўзбекистонлик шахматчида ғалаба қозониш имкониятлари бор эди, бироқ эндшпилда устунлик бой берилди.

Иккинчи турда у Винсент Кеймер билан дуранг ўйнади. Муайян бир пайтда Синдаров мураккаб позицияга тушиб қолди, аммо сейтнотда уни ушлаб қолишга муваффақ бўлди.

Ўзбекистон вакили турнирдаги илк ғалабасини учинчи турда Ёрден ван Форест устидан қозонди. Синдаров ҳар хил рангдаги филлар ва тўралар иштирокидаги эндшпилда ғалабани қўлга киритди.

Биринчи кундан сўнг у максимал олти очкодан тўрт очко жамғариб, Уесли Со билан иккинчи ўринни бўлишиб олди ва Прагнанандхадан атиги бир очкога ортда қолди.

“Умуман олганда, кунни плюс бир натижаси билан якунлаганимдан мамнунман, чунки Кеймерга қарши иккинчи партия мураккаб кечди. Муайян бир пайтда шунчаки мағлуб бўлаётган эдим, аммо сейтнотда позицияни сақлаб қолишга эришдим”, — деди Синдаров.

**Иккинчи кун:**

Иккинчи куни Синдаров Прагнанандха, Левон Аронян ва Фабиано Каруанага қарши учта партия ўтказди.

Тўртинчи турда Прагнанандха ҳали дебютдаёқ ўзбекистонлик шахматчининг филини тутиб олди ва ортиқча фигурага эга бўлди. Бироқ Синдаров вазиятни мураккаблаштирди ва умидсиздек кўринган позицияни сақлаб қолишга эришди.

Аронянга қарши кейинги партияда эса Синдаров катта устунликка эга бўлди ва узоқ вақт давомида ғалабага яқин турди. Кейинчалик позиция рақиб фойдасига ўзгарди, аммо партия юришлар такрорланиши билан дуранг билан якунланди. Ўйиндан сўнг ўзбекистонлик шахматчи Аронянга ғалаба келтириши мумкин бўлган юришни кўрсатди.

“Партия тугаганидан кейин буни унутиш керак, лекин бу осон эмас”, — деди Синдаров бой берилган имконият ҳақида гапирар экан.

Олтинчи турда у Каруанага қарши ёмонроқ позицияда бўлди. Ўзбекистонлик шахматчи бир нечта аниқ ҳимоя юришларини топиб, америкалик гроссмейстерга устунликни амалга оширишга имкон бермади.

Олти тур якунларига кўра, Синдаров етти очко жамғариб, Прагнанандхадан икки очкога ортда қолган ҳолда иккинчи ўринни эгаллаб турганди.

**Учинчи кун:**

Рапиднинг сўнгги кунини Синдаров Аниш Гирига қарши дуранг билан бошлади.

Саккизинчи турда ўзбекистонлик шахматчи америкалик гроссмейстер Авондер Лянни мағлуб этди. Синдаров изчил равишда рақибнинг ажралиб қолган пиёдаларига босим ўтказди. 24…г6 юришидан сўнг қораларда тўртта ажралиб қолган пиёда ҳосил бўлди ва уларнинг ожизлиги Ўзбекистон вакилига партияни ғалабагача етказиш имконини берди.

Сўнгги турда Синдаров Кеймер билан дуранг ўйнади ва рапидни бирорта ҳам мағлубияциз якунлади.

Прагнанандха тўққизинчи турда ван Форестга имкониятни бой бериб қўйди, аммо 12 очко билан биринчи ўринни сақлаб қолди. Синдаров 11 очко билан иккинчи, Уесли Со эса 10 очко билан учинчи бўлиб маррага етиб келди.

“Менимча, АҚШда ҳаммаси Варшавадагидан кўра яхшироқ кечмоқда. Бироқ эртага оғир кун бўлади. Кўрамиз, умид қиламанки, кўпроқ очко жамғаришга ҳаракат қиламан”, — деди Синдаров.

Саинт Лоуис Рапид & Блитз турнири блиц баҳслари билан яна икки кун давом этади. Иштирокчилар 18 та партиядан иборат икки айланмали турнир ўтказади. Рапиддан фарқли ўлароқ, блицда ғалаба учун бир очко, дуранг учун эса ярим очко берилади.

Блицнинг дастлабки тўққизта тури 5-август куни Тошкент вақти билан соат 22:10 да бошланади. Старт партиясида Синдаров Левон Аронян билан тўқнаш келади.

Турнир 2-августдан 6-августгача бўлиб ўтмоқда. Унда ўнта гроссмейстер иштирок этмоқда, умумий мукофот жамғармаси 200 минг долларни ташкил этади. Ғолиб 50 минг долларни қўлга киритади.