Голливуднинг миллиард долларлик шедеврлари: касса рекордлари даврини бошлаб берган 4 та филм

**Голливуднинг миллиард долларлик шоҳ асарлари: Касса рекордлари даврини бошлаб берган 4 та филм**

Бир пайтлар филмларнинг жаҳон прокатида 1 миллиард доллар йиғиши деярли имконсиздек туюларди. Бироқ 1990-йилларнинг охирида бу маррага илк бор эришилди ва кино тарихида янги давр бошланди. Қуйида миллиард долларлик кассани забт этган илк тўртта филм ҳақида сўз юритамиз.

**“Титаник”**

Бу борадаги мутлақ рекордчи, албатта, Жеймс Кемероннинг “Титаник” филми бўлди. Картина 12 йил давомида тарихдаги энг кўп даромад келтирган филм мақомини сақлаб қолди. Суратга олиш жараёнида бюджет бир неча бор оширилиб, якунда у ўша давр учун рекорд даражадаги — 200 миллион долларни ташкил этди. Бугунги кунда бундай маблағ билан ҳеч кимни ҳайратга солиб бўлмаса-да, ХХ аср охирида бу мислсиз сумма эди.

Шу сабабли кўпчилик “чўкмайдиган” лайнер ҳалокати фонидаги Жек ва Роузнинг севги ҳикояси ўзини оқламаслигидан хавотирланган. Ҳатто Жеймс Кемерон бир неча бор ишдан бўшатилиш хавфи остида қолган. Бироқ продюсерлар лойиҳани бошқа ҳеч ким муваффақиятли якунлай олмаслигини тушуниб, режиссёрни қўллаб-қувватлаган. Натижада филм кино тарихида илк бор 1 миллиард долларлик касса йиғимига эришди.

“Титаник” кинотеатрларда 44 ҳафта давомида намойиш этилиб, зални тўлдиришда давом этди. Бугунги кунга келиб, қайта намойишлар ҳисобига унинг умумий даромади 2,2 миллиард доллардан ошган.

**“Узуклар ҳукмдори: Қиролнинг қайтиши”**

Питер Жексон трилогиясининг якуний филми катта муваффақият қозониши кутилган эди, аммо у янги молиявий рекордлар ўрнатишини кўпчилик тасаввур қилмаган.

Минглаб қаҳрамонлар иштирокидаги улкан жанг саҳналари ва кенг кўламли компютер графикаси филм харажатларини 300 миллион долларгача етказди. Қолаверса, аввалги икки қисм жуда юқори мезон ўрнатгани учун уларни ортда қолдириш осон эмасди.

Шунга қарамай, филм жаҳон прокатида 1,142 миллиард доллар ишлаб топди. Жексон Ж.Р.Р. Толкин асарлари мухлисларини ҳам, кенг аудиторияни ҳам ўзига ром эта оладиган улкан киноепопея яратишга муваффақ бўлди.

Филм нафақат трилогиянинг тижорий муваффақиятини давом эттирди, балки франчайзанинг умумий даромадини 3 миллиард долларга етказди. Бундан ташқари, “Узуклар ҳукмдори: Қиролнинг қайтиши” ҳозиргача “Энг яхши филм” номинациясида “Оскар” мукофотини қўлга киритган ягона фентези филми бўлиб қолмоқда. Картина жами 11 та “Оскар”ни қўлга киритган.

**“Кариб денгизи қароқчилари: Мурдалар сандиғи”**

Ушбу рўйхатдаги энг кутилмаган филм айнан шу бўлса керак. Бироқ бунинг сабаби унинг сифати ёки Жек Читтак мухлисларининг камлигида эмас.

2006-йилда экранларга чиққан “Кариб денгизи қароқчилари: Мурдалар сандиғи” аслида йирик ҳикоянинг бир қисми сифатида суратга олинган эди. Орадан бир йил ўтиб намойиш этилган “Кариб денгизи қароқчилари: Дунёнинг чеккасида” филми ундан ҳам муваффақиятли бўлиши кутилганди. Аммо учинчи қисм миллиардлик маррани забт эта олмади, иккинчи филм эса 1,066 миллиард доллар даромад келтирди.

Қизиғи шундаки, бу натижа бюджет жиҳатидан ҳам тежамкорроқ лойиҳа билан қўлга киритилди — 225 миллион доллар, учинчи қисм эса 300 миллион долларга тушган эди. Натижада Дисней катта фойда кўрди, Жонни Депп эса Голливуднинг энг кассабоп актёрларидан бири сифатидаги мақомини янада мустаҳкамлади.

**“Қора рицар”**

Кристофер Нолан филмлари умумий ҳисобда 6 миллиард доллардан ортиқ даромад келтирган. Улар орасида Кристиан Бейл иштирокидаги Бетмен трилогияси алоҳида ажралиб туради.

Хит Леджер ижро этган Жокер образи эса “Қора рицар”ни суперқаҳрамонлар ҳақидаги филмлар тарихидаги классик асарга айлантирди. У 1 миллиард долларлик даромадни ортда қолдирган илк суперқаҳрамон филми бўлиб, комикслар асосидаги кинолар ҳам жиддий ва чуқур мазмунга эга бўлиши мумкинлигини исботлади.

Филмга бўлган улкан қизиқиш нафақат Бетмен ва Жокер қарама-қаршилиги, балки Хит Леджернинг премьерадан аввал фожиали вафоти билан ҳам боғлиқ эди. Актёр иккинчи пландаги энг яхши рол учун вафотидан сўнг “Оскар” мукофоти билан тақдирланди ва кино тарихидан абадий жой олди. Унинг ўлимисиз филм шунча даромад топган-топмагани номаълум, бироқ у барибир култ картинага айланиши шубҳасиз.