ФИФА президенти сайловда ютиш учун ЖЧ-2030 финалини Марокашга топширмоқчи
ФИФА президенти Жанни Инфантино 2027-йилги президентлик сайловида ғалаба қозониш мақсадида 2030-йилги Жаҳон чемпионати финалини Марокашга беришни ваъда қилган.
Тҳе Тимес нашрининг хабар беришича, Инфантино Работда шошилинч учрашув ўтказиб, Марокаш қироллик футбол федерацияси президенти Фавзи Лекжаанинг қўллаб-қувватлашига эришган. Маълумотларга кўра, ЖЧ-2030 финали Мадриддаги “Сантяго Бернабеу” стадионида эмас, балки Касабланкада қурилаётган ва дунёдаги энг катта сиғимга эга бўлиши кутилаётган “Ҳасан ИИ” стадионида ўтказилиши режалаштирилмоқда.
Қайд этилишича, Инфантино ўн йил аввал ФИФА президентлигига сайланганидан буён энг ишончли иттифоқчиларидан бири бўлган Марокашнинг қўллаб-қувватлашини сақлаб қолишга интилмоқда. Бунинг эвазига Марокаш нафақат мундиал мезбонларидан бири сифатидаги мақомини мустаҳкамлайди, балки Испания ва Португалия билан биргаликда ўтказиладиган турнир финалини ҳам қабул қилиш имкониятини қўлга киритади.
Бироқ бу режа Саудия Арабистонининг розилигига ҳам боғлиқ бўлиши мумкин. Инфантино учун анъанавий таянч ҳисобланган ва 2034-йилги Жаҳон чемпионати мезбони сифатида тасдиқланган мамлакат ҳозирча бу масала юзасидан ҳеч қандай муносабат билдирмаган.
Агар Инфантино 2027-йилги ФИФА президентлиги сайловида мағлуб бўлса, унинг ўрнига келадиган янги раҳбар финал учрашуви ўтказиладиган стадион бўйича қарорни ўзгартириши мумкин.
Инфантинонинг мухолифлари эса финал мезбони бўйича берилган ҳар қандай ваъда юридик кучга эга эмаслигини ва ФИФА президенти алмашган тақдирда бу қарор бекор қилиниши мумкинлигини таъкидламоқда. Айни пайтда Испания ҳам, Рафаел Лузан раҳбарлигида ва амалдаги Жаҳон чемпиони сифатида, Марокаш билан сиёсий курашни янада кескинлаштирмоқда.
Вазиятга УЕФА маслаҳатчиси Луис Фигу ҳам аралашиб, Жанни Инфантинони зудлик билан истеъфога чиқишга чақирди. Бундан ташқари, ўнлаб Европа клублари ФИФАъдан уларга ваъда қилинган, аммо ҳанузгача тақсимланмаган 250 миллион долларлик бирдамлик жамғармаси маблағларини талаб қилаётгани ҳам ташкилот атрофидаги босимни кучайтирмоқда.
Аввалроқ Испаниянинг ҳукмрон коалицияси депутатлари мамлакат ҳукуматини 2030-йилги футбол бўйича Жаҳон чемпионатини Марокаш билан биргаликда ўтказиш режасидан воз кечишга чақирган эди. Бунга Сеута шаҳридаги миграция инқирози сабаб қилиб кўрсатилмоқда.