Фарғонада “Мансур Казанский” ва шериги ушланди

Фарғона вилоятида уюшган жиноятчиликка алоқадор шахс, "Мансур Казанский" лақаби билан танилган Мансур Фозилович Арипов товламачилик жиноятини содир этаётган вақтида қўлга олинди. Бу ҳақда Фарғона вилояти ИИБ ахборот хизмати маълум қилди.

Тошкент шаҳрида яшовчи фуқарога тегишли бўлган нотурар жойни 1 миллион 200 минг долларга сотиб олишга келишган Арипов Мансур Фозилович, ҳисоб-китобни ушбу обьектни гаровга қўйиш орқали банк кредити ҳисобидан амалга оширишни режалаштирган.

Обьект нотариал тартибда Арипов номига расмийлаштирилгандан сўнг, у кредит бўйича ойлик тўловлар ва фоизлар билан танишиб, қарз олишдан бош тортган. Бироқ, у обьектни асл эгасига қайтариш ўрнига, уни жабрланувчининг номига қайта расмийлаштириб бериш эвазига 200 минг доллар талаб қила бошлаган.

Бундан ташқари, Арипов 1968-йилда туғилган шериги билан бирга жабрланувчининг тадбиркор ҳамкорига ҳам босим ўтказиб, унга нисбатан қораловчи материаллар тўплангани ва жиноий жавобгарликка тортиш билан қўрқитиб, пул беришга мажбурлаб келган.

Фарғона вилояти ИИБ ва ДХХ ходимларининг ҳамкорлигида ўтказилган тезкор тадбирда гумонланувчи Фарғона шаҳридаги Бурҳониддин Марғиноний кўчасида жойлашган нотариал идорада нотурар бинони жабрланувчига ўтказиб бериш эвазига 100 минг доллар олаётган вақтида ашёвий далиллар билан ушланган.

Мазкур ҳолат юзасидан Жиноят кодексининг 165-моддаси (товламачилик) билан жиноят иши қўзғатилиб, жиноятга алоқадор шахслар процессуал тартибда ушланган. Ҳуқуқ-тартибот органлари ушбу шахслардан жабр кўрган фуқаролардан 102 рақамига қўнғироқ қилиб хабар беришни сўраган.

Аввалроқ, коттеж савдоси ортидан товламачилик қилган ака-укалар ҳам ушланган эди. Улар уй харид қилиб, тўловнинг маълум бир қисмини амалга оширмай, уй эгасига тазьиқ ўтказишган.