“Барселона” Хулиан Алварес учун қанча тўламоқчи эканлиги маълум бўлди
Хулиан Алварес учун "Барселона"нинг таклиф миқдори ошкор бўлди.
"Барселона" раҳбарияти Мадриднинг "Атлетико" клуби ҳужумчиси Хулиан Алваресни ўз сафига қўшиб олиш ниятидан воз кечгани йўқ. СОПЕ нашрининг хабар беришича, каталонияликлар спорт директори Деку ва унинг ёрдамчиси Жоау Амарал трансферни расмийлаштириш режасини ишлаб чиқиш мақсадида Мадридга етиб борган. Улар Испания пойтахтида Аргентина терма жамоасининг 26 ёшли а'зоси манфаатларини ҳимоя қилувчи агент Фернандо Идалго билан музокаралар ўтказади.
Қайд этилишича, Алварес Жаҳон чемпионатидан сўнг Ибизада дам олмоқда ва 10-август, душанба куни машғулотларга қайтиши лозим. Футболчининг вакиллари у клубини ўзгартириш истагида эканини яширмаяпти. Агентларнинг сўзларига кўра, Хулиан қуйидаги қат'ий қарорга келган: "У фақатгина 'Барселона' шарафини ҳимоя қилишни ва келаси мавсумда Ҳанси-Дитер Флик қўл остида ўйнашни хоҳламоқда".
Таъкидланишича, Каталония клуби аргентиналик ҳужумчи трансфери учун 100 миллион евролик таклифини ўз кучида қолдирган. Шу билан бирга, "Атлетико" раҳбарияти бу борада умуман музокара ўтказмоқчи эмас. Клуб бош директори Мигел Анхел Хил ҳужумчининг ҳатто "200 миллион евро эвазига ҳам" сотилмаслигини айтиб, трансфер эҳтимолини бутунлай инкор этди.
Аввалроқ томонлар ўртасидаги муносабатлар жиддий кескинлашгани ҳақида хабар қилинганди: мадридликлар "кўк-анорранглилар"нинг хатти-ҳаракати устидан Испания қироллик футбол федерациясига шикоят киритган ва айни пайтда суриштирув ишлари бошланган. Декунинг футболчи агенти билан учрашуви трансфер йўлидаги муҳим қадам ҳисобланади, бироқ "Барселона"нинг асосий вазифаси — ҳозирча ҳар қандай мулоқотдан бош тортаётган Мадрид клубини расмий музокаралар столига ўтқазиш йўлини топишдан иборат.
Маълумот ўрнида, Хулиан Алварес 2025/2026-йилги мавсумда барча турнирлар доирасида 49 та учрашувда майдонга тушиб, 20 та гол ва 9 та голли узатмага муаллифлик қилди. Трансфермаркт порталига кўра, футболчининг тахминий трансфер қиймати 120 миллион еврони ташкил этади. Унинг испан клуби билан амалдаги шартномаси 2030-йилнинг ёзига қадар мўлжалланган.