Испания қироллик футбол федерацияси “Барселона”га қарши иш очди
Испания Қироллик футбол федерацияси (РФЕФ) Мадриднинг "Атлетико" клубининг шикояти асосида "Барселона"га нисбатан интизомий иш очди. Бу ҳолатга каталонияликларнинг аргентиналик ҳужумчи Хулиан Алварес билан қонунга зид музокаралар олиб боргани сабаб бўлган.
ЭФЕ агентлигининг хабар беришича, федерациянинг интизомий қўмитаси футболчи билан эҳтимолий алоқалар туфайли иш қўзғатган ва жараённи ўрганиш учун махсус инструктор тайинлаган. Ҳар икки клуб ҳам бу ҳақда расман хабардор қилинган бўлиб, "Барселона" ушбу қарор устидан апелляция бериш ҳуқуқига эга.
"Тҳе Атҳлетис" нашрининг маълумотларига кўра, "Атлетико" "Барселона"ни ахлоқ нормаларини бузганликда айбламоқда. Мадрид клуби каталонияликлар амалдаги шартномаси 2030-йилгача мўлжалланган футболчи билан рухсациз музокара олиб борганини даъво қилмоқда.
Таъкидлаш жоизки, баҳорда "Барселона" Алварес борасида музокаралар олиб бораётгани ҳақида хабарлар тарқалган ва буни клуб президенти Жоан Лапорта ҳам тасдиқлаган эди. Манбаларга кўра, "кўк-анорранглилар" аргентиналик футболчи учун 100 миллион евролик расмий таклиф тайёрлаган. Бу хабарлардан сўнг "Атлетико" ижтимоий тармоқларда "Барселона"га қаратилган бир қатор кинояли постлар қолдирганди.
Июн ойида эса Мадриднинг бошқа бир жамоаси "Реал" Алварес учун 150 миллион евро таклиф қилган, бироқ "Атлетико" унинг товон пули 500 миллион евро эканини айтиб, сотишдан бош тортган эди.
Маълумот учун, 26 ёшли ҳужумчи 2024-йилдан буён "Атлетико" шарафини ҳимоя қилиб келмоқда. Мадридликлар сафида у шу кунгача 106 та ўйинда майдонга тушиб, 49 та гол ва 17 та голли узатмага муаллифлик қилган. Бунгача футболчи Англиянинг "Манчестер Сити" клуби сафида Чемпионлар Лигаси, Англия Кубоги ва Суперкубоги, икки марта Англия чемпионлиги, Клублар ўртасидаги Жаҳон чемпионати ҳамда УЕФА Суперкубогини қўлга киритган. Аргентина терма жамоаси сафида эса (59 ўйин, 15 гол) 2022-йилда Жаҳон чемпиони бўлган ҳамда икки марта Америка Кубогида (2021, 2024) зафар қучган.