40 минг доллар мукофот: Жавоҳир Синдоров нуфузли турнирда иккинчи бўлди

40 минг доллар мукофот билан Жавоҳир Синдоров нуфузли турнирда иккинчи ўринни эгаллади.

АҚШнинг Сент-Луис шаҳрида бўлиб ўтган “Гранд Чесс Тоур” сериясининг навбатдаги босқичи – “Саинт Лоуис Рапид & Блитз 2026” турнири якунига етди. Мусобақада чемпионлик учун ҳиндистонлик гроссмейстер Рамешбабу Праггнанандҳа ва ўзбекистонлик шахматчи Жавоҳир Синдоров ўртасида қизғин рақобат кузатилди.

Турнирнинг ҳал қилувчи босқичида Синдоров чемпионлик учун курашни давом эттириш имкониятини сақлаб қолган эди. Аммо 17-турда Праггнанандҳага қарши кечган асосий баҳс дуранг билан якунланди. Бу натижа ҳиндистонлик гроссмейстерга мусобақа тугашига бир тур қолганида чемпионликни муддатидан аввал қўлга киритиш имконини берди.

Шу тариқа, Рамешбабу Праггнанандҳа ўз фаолиятида илк бор “Саинт Лоуис Рапид & Блитз” турнирининг бош совринини қўлга киритди. Бу муваффақият эвазига у 50 минг АҚШ доллари миқдорида мукофот пули ҳамда “Гранд Чесс Тоур” умумий рейтинги учун муҳим очколарга эга бўлди.

Ўзбекистонлик гроссмейстер Жавоҳир Синдоров эса мусобақа давомида барқарор ва юқори даражадаги ўйини билан ажралиб турди. У турнирни иккинчи ўринда якунлаб, 40 минг АҚШ доллари миқдорида мукофот пулини қўлга киритди. Синдоров мусобақа давомида Праггнанандҳанинг энг яқин рақиби бўлиб қолди ва чемпионлик учун курашни сўнгги тургача давом эттирди.