Özbekistonda yöl çiziqlari buzilişini qayd etiş tartibi özgaradi
1 noyabrdan Özbekistonda yöl çiziqlarini bosiş, xavfsizlik kamarini taqmaslik va statsionar radarlarni belgilaş tartibiga özgartişlar kiritiladi.
O‘zbekistonda yo‘l chiziqlari buzilishini qayd etish tartibi o‘zgaradi
1 noyabrdan boshlab O‘zbekistonda chorrahalar va qayrilib olish joylari yaqinidagi gorizontal yo‘l chiziqlarini bosib harakatlanish bilan bog‘liq qoidabuzarliklarni rasmiylashtirish tartibi o‘zgaradi.
Tegishli qoidalar Vazirlar Mahkamasining 2026 yil 29 oktyabrdagi 596-son qarorida belgilangan.
Hujjatga muvofiq, Yo‘l harakati xavfsizligi xizmati inspektorlari chorrahalargacha bo‘lgan 50 metr masofada va qayrilib olish joylarigacha bo‘lgan 20 metr masofada 1.1 va 1.3 yo‘l chiziqlarini bosib harakatlanganlik uchun ma’muriy bayonnoma rasmiylashtirmaydi.
Shu bilan birga, qarorda xavfsizlik kamarlaridan foydalanish bilan bog‘liq qoidabuzarliklarni avtomatik tarzda qayd etish imkoniyati ham nazarda tutilgan. Maxsus avtomatlashtirilgan foto va video qayd etish majmualari xavfsizlik kamarini taqmagan holda avtomobilni boshqarish va yo‘lovchilarni tashish holatlarini aniqlay oladi.
Buning uchun uskunalar belgilangan texnik talablarga javob berishi va ma’lumotlarni «Ma’muriy amaliyot» moduliga avtomatik tarzda uzatish imkoniyatiga ega bo‘lishi kerak.
O‘zgarishlar statsionar radarlarni belgilash tartibiga ham taalluqli. 5.43 “Radar” yo‘l belgisi qurilma ishlash hududining bevosita o‘zida, shuningdek, undan 250 metrdan 500 metrgacha oldingi masofada o‘rnatilishi lozim.
Haydovchilarga yangi qoidalarni inobatga olish va yo‘l harakati qoidalari talablariga rioya etish tavsiya etiladi.