Yonilgʻi xarajatlari baʼzi korxonalar uchun foyda marjasini kamaytirmoqda
Dizel yoqilgʻisi narxi yaqinda bir litr uchun 2 funt sterlingdan oshdi va bojning muzlatilishi yetarli boʻlmaydi degan xavotirlar mavjud.
**Yonilgʻi xarajatlari ayrim korxonalar foydasini qisqartirmoqda**
Soʻnggi haftalarda Jersida dizel yonilgʻisi narxi bir litri uchun 2 funt sterlingdan oshdi va oroldagi baʼzi korxonalar dunyo boʻylab yonilgʻi narxining oshishi oqibatlaridan xavotirda ekanini aytmoqda.
Mahalliy darajada va Buyuk Britaniyada dizel narxi yaqinda litri uchun 2 funt sterlinglik marradan oshdi va shundan beri jahon yetakchilari taʼminotdagi bosimni kamaytirishga qaratilgan choralarni koʻrdilar.
Jersi hukumati "turmush darajasi xarajatlari bosimini yengillatishga yordam berish" maqsadida 2027 yilda yonilgʻi bojini muzlatishni taklif qildi.
A&A Scaffolding Solutions bu qarorni qoʻllab-quvvatlashini bildirdi, biroq "jahon narxlari koʻtarilishda davom etsa, bu cheklangan darajadagina yengillik berishini" qoʻshimcha qildi.
Jersida yonilgʻi boji 2023-2025 yillarda muzlatilgan edi, 2026 yilda esa inflyatsiyaga mos ravishda oshirildi.
Hukumatning bildirishicha, "yonilgʻi bojini amaldagi stavkada saqlab turish transportdan foydalanadigan xonadonlar va korxonalar uchun qoʻshimcha xarajatlarning oldini olishga yordam beradi hamda koʻplab orolliklar moliyaviy bosim ostida qolayotgan bir paytda uzluksiz yordamni taʼminlaydi".
Shunga qaramay, oroldagi baʼzi korxonalar bu chora dunyodagi yuqori narxlarni qoplash uchun yetarli boʻlmasligidan xavotirda.
A&A Scaffolding Solutions vakili Kelli Kiting shunday dedi: "Dizel narxining oshishi biz uchun jiddiy xavotir manbaidir, ayniqsa, bu Jersi boʻylab ortib borayotgan boshqa koʻplab xarajatlarning ustiga qoʻshilayotgan bir paytda".
"Kurilish sohasiga ogʻir zarba tegmoqda. Biz texnika, transport va yetkazib berish uchun dizelga tayanamiz, shuning uchun narxlarning oshishi ishlarni bajarish qiymatiga bevosita bosim oʻtkazadi.
Xomashyo, yuk tashish va operativ xarajatlarning oshishi bilan bir qatorda, bu foyda marjasini qisqartirmoqda va loyihalar narxini ishonch bilan belgilashni qiyinlashtirmoqda".
"Yonilgʻi bojining muzlatilishi xush qarshilanadi, ammo xavotirimiz shundaki, agar jahonda yonilgʻi narxlari oshishda davom etsa, bu juda kam yengillik beradi.
Kengroq muammo — bu umumiy toʻplanib borayotgan taʼsirdir. Korxonalar narx oshishini investitsiyalarga, loyihalarning oʻzini oqlashiga va oxir-oqibat mijozlar toʻlaydigan narxlarga taʼsir qilmasdan oldin faqat muayyan chegaragachagina oʻz zimmasiga ola olishadi".
Yonilgʻi xarajatlari Jonathan Le Maistre Ltd daraxt parvarishlash firmasiga ham "sezilarli taʼsir" koʻrsatmoqda.
Firma vakili Darren Xopkins shunday dedi: "Biz sezilarli darajada yonilgʻi isteʼmol qiladigan furgonlarimiz, yuk mashinalarimiz, yogʻoch maydalagichlarimiz, toʻnka sidirgichlarimiz va boshqa texnikalarimizga bogʻliqmiz".
"Dizel narxining oshishi operativ xarajatlarimizni oshiradi, bu esa bajariladigan ishlardan olinadigan foydani kamaytiradi va xarajatlarning bir qismini mijozlarimizga yuklamasdan oʻz zimmamizga olishni qiyinlashtiradi".
Xopkinsning aytishicha, narxlarning yanada oshishi "ularning biznesi va umuman soha uchun xavotirlidir".
Barette Plant Hire vakili Jeremi Fillipsning taʼkidlashicha, bu "hozirgacha unchalik katta muammo boʻlgani yoʻq, ammo soatbay stavkalarga yonilgʻi uchun qoʻshimcha toʻlovlar qoʻshilmoqda".
Biroq, u "agar narxlar koʻtarilishda davom etsa, mijozlar oʻz loyihalarini davom ettirmay qoʻyishlarini" aytdi.
Oʻsha paytda Gʻaznachilik vaziri Alan Maklin hukumatga "yonilgʻi bojini kamaytirish gʻoyasi yoqmaganini, chunki bu manzilli emasligini" aytgan edi.
Buning oʻrniga vazirlar 2027 yil uchun bojni muzlatishni maʼqul koʻrdilar va asosiy eʼtiborni oilalarni hamda "eng koʻp qiynalayotganlarni" manzilli qoʻllab-quvvatlashga qaratdilar.
Korxonalar tomonidan bildirilgan soʻnggi xavotirlarga javoban Maklin shunday dedi: "Biznessdan yonilgʻi narxining oshishi kabi ortgan xarajatlarni oʻz zimmasiga olishini kutishdan koʻra, byudjet isteʼmolchilarni ushbu bosimlarni yengib oʻtishlari va mahalliy iqtisodiyotga mablagʻ sarflashlari uchun toʻgʻridan-toʻgʻri qoʻllab-quvvatlaydi".
"Yonilgʻi narxlari, asosan, Jersi nazoratidan tashqaridagi jahon bozorlari va geosiyosiy voqealar tomonidan belgilanadi.
Hukumat qila oladigan narsa — imkon qadar qoʻshimcha bosim paydo boʻlishining oldini olishdir.
Yonilgʻi bojini muzlatish boʻyicha taklif qilinayotgan chora boj darajasini real koʻrinishda kamaytirish orqali narxlar oshishi taʼsirini yumshatishga yordam beradi".