YEI va NATO: Germaniyaga qarshi gibrid hujumlar javobsiz qolmaydi

Yevropa Ittifoqi va NATO: Germaniyaga qarshi gibrid hujumlar javobsiz qolmaydi

Yevropa Ittifoqi va NATO Germaniyaning Leypsig aeroportida sodir etilgan diversiyaga urinishda Rossiyani ayblab, Moskvaga qarshi yangi choralar joriy etish qarorini qoʻllab-quvvatladi.

Yevropa komissiyasi prezidenti Ursula fon der Lyayen Germaniya kansleri Fridrix Mers bilan suhbatdan soʻng Yevropa Ittifoqi Germaniya bilan "toʻliq birdam" ekanini bildirdi. Uning taʼkidlashicha, Germaniya hukumati qatʼiy choralar koʻrdi va bu bilan gibrid hujumlar javobsiz qolmasligi haqida aniq signal berildi. Fon der Lyayen Yevropa davlatlari Rossiya agressiyasiga qarshi birgalikda harakat qilishda davom etishini hamda Ukrainaga zarur boʻlgan muddat davomida yordam koʻrsatilishini aytdi.

Yevrokomissiya rahbari 2-sentabr kuni mazkur masalani NATO bosh kotibi Mark Ryutte bilan muhokama qilishini maʼlum qildi. Shuningdek, Yevropa Ittifoqi tashqi ishlar vazirlari darajasida maslahatlashuvlar oʻtkazilishi va unda Rossiyaga qarshi yangi sanksiyalar masalasi ham koʻrib chiqilishi rejalashtirilgan.

Mark Ryutte ham Mers bilan muloqotdan soʻng NATO Germaniya bilan "toʻliq birdam" ekanini bildirdi va Berlinning javob choralarini olqishladi. Uning soʻzlariga koʻra, alyans barcha aʼzo davlatlarni har qanday tahdidlardan, jumladan, Leypsigda va NATO hududining boshqa joylarida kuzatilgan kabi zararli harakatlardan himoya qilish va tiyib turish imkoniyatlarini kuchaytirishda davom etadi.

Germaniyaga Fransiya prezidenti Emmanuel Makron ham qoʻllab-quvvatlash bildirdi. U Fransiya Germaniya bilan toʻliq birdam ekanini va Rossiyaga qarshi yangi Yevropa sanksiyalarini qoʻllab-quvvatlashini maʼlum qildi.

Shvetsiya bosh vaziri Ulf Kristersson, Ispaniya hukumati rahbari Pedro Sanches va Avstriya kansleri Kristian Shtoker ham Berlinga hamdardlik bildirdi.

Estoniya hukumati esa Leypsig aeroportiga uchuvchisiz qurilma orqali hujum qilishga urinish Rossiya butun Yevropa uchun tahdid solayotganini koʻrsatishini taʼkidladi. Latviya va Litva hukumatlari ham Germaniya bilan birdamlik bildirdi.

Ukraina tomoni ham Berlinning harakatlarini qoʻllab-quvvatladi. Ukrainaning Germaniyadagi elchisi Aleksey Makeyev Germaniyaning Leypsigdagi hodisaga nisbatan "qatʼiy munosabatini" olqishladi. Uning bildirishicha, Ukraina Germaniya bilan muhim infratuzilmani dronlardan himoya qilish, Rossiyaning "soya floti"ga qarshi muvofiqlashtirilgan kurash va qoʻshimcha sanksiyalar joriy etish masalalarida yaqin hamkorlik qilmoqda.