Yashash uchun dunyodagi eng yaxshi mamlakat aniqlandi
Reyting natijalariga koʻra, 2026-yilda yashash uchun eng yaxshi mamlakat sifatida Estoniya eʼtirof etildi. Boltiqboʻyidagi ushbu davlat 72,8 ball toʻplab, 184 mamlakat orasida birinchi oʻrinni egalladi.
Yashash uchun dunyodagi eng yaxshi mamlakat aniqlandi
Ikkinchi oʻrinni 72,6 ball bilan Singapur, uchinchi oʻrinni esa 72,0 ball bilan Malayziya egalladi
Estoniyaning peshqadamlikka chiqishi alohida eʼtiborga loyiq. Aholisi qariyb 1,3 million kishidan iborat bu mamlakat xavfsizlik va yashash uchun qulay sharoit yaratish koʻrsatkichlarida yuqori natija qayd etgan. Bunga samarali huquqiy tizim, rivojlangan startap ekotizimi hamda yoshlar orasida ishsizlik darajasining pastligi asosiy omillardan biri sifatida ko‘rsatilgan.
Boltiqboʻyi davlatlari orasida boshqalar ham yaxshi natija ko‘rsatdi. Litva 71,0 ball bilan 10-oʻrinni, Latviya esa 68,7 ball bilan 18-oʻrinni egallab, dunyodagi eng yaxshi 20 ta mamlakat safidan joy oldi.
Umuman olganda, kuchli yigirmatalikning yarmi Yevropa davlatlariga toʻgʻri kelgan. Jumladan, Portugaliya 71,6, Chexiya 69,9 va Malta 69,8 ball toʻplagan.
Yevropa mamlakatlarining yuqori oʻrinlarni egallashida tibbiy xizmat sifati va umumiy turmush darajasi muhim rol oʻynagan. Shu bilan birga, Janubiy va Sharqiy Yevropada yashash xarajatlarining nisbatan maqbulligi ayrim davlatlarga qoʻshimcha ustunlik bergan. Xususan, Bolgariya va Kipr 69,7 balldan toʻplab, Shimoliy va Gʻarbiy Yevropaning ayrim mashhur mamlakatlarini ortda qoldirgan.
Sharqiy va Janubi-Sharqiy Osiyo davlatlari ham reytingda yuqori natijalar qayd etgan. Tayvan 71,4 ball bilan dunyoda 5-oʻrinni egallagan. Bruney 69,3 va Yaponiya 69,1 ball bilan kuchli yigirmatalikdan joy olgan.
Reytingning quyi qismida esa Afrika mamlakatlari ustunlik qiladi: oxirgi 20 ta oʻrindan 13 tasi qitʼa davlatlariga toʻgʻri kelgan.
Afrika mamlakatlari orasida eng past koʻrsatkich Janubiy Sudanda — 42,3 ball. Biroq umumiy reytingda eng past natija Afgʻonistonda qayd etilgan — 39,5 ball. Yaman esa 41,4 ball bilan reytingning soʻnggi oʻrinlaridan birini egallagan.