Yangi Toshkentda 500 kishilik shaxmat saroyi paydo boʻlishi mumkin

2 soat oldin

Yangi Toshkentda 500 kishilik oʻyin zali, yotoqxona va sport maydonchalariga ega zamonaviy shaxmat saroyi qurilishi mumkin. Bunday taklifni Prezident Shavkat Mirziyoyev «Koʻksaroy» qarorgohida shaxmat va parashaxmat boʻyicha Oʻzbekiston terma jamoalari aʼzolari bilan uchrashuvda ilgari surdi.

Tashabbus oʻzbek shaxmatchilarining navbatdagi muvaffaqiyatidan soʻng yangradi. Toʻrt yil avval milliy terma jamoa Hindistonning Chennay shahrida ilk bor shaxmat olimpiadasida gʻolib chiqqan edi. 2024 yilda jamoa Budapeshtda uchinchi boʻldi, bugun esa Samarqandda yana oltin medalni qoʻlga kiritdi.

Davlat rahbari bunday natijalar tizimli ishlar samarasi ekanini taʼkidladi. Uning soʻzlariga koʻra, ilgari mamlakatda iqtidorli shaxmatchilar koʻp boʻlgan, biroq ularni qoʻllab-quvvatlaydigan va birlashtiradigan tizim yetishmagan. 2018 yilda qabul qilingan qarordan soʻng maktablarda shaxmat oʻqitishni rivojlantirish, trenerlar tayyorlash va klublar faoliyatini yoʻlga qoʻyish boshlandi.

Tayyorgarlik tizimini yanada rivojlantirish maqsadida Samarqand, Xorazm va Fargʻona viloyatlarida Toshkent xalqaro shaxmat akademiyasining uchta hududiy filiali ochiladi. Akademiyaning oʻzida ham oliy toifali trenerlarni tayyorlash tashkil etiladi.

Yana bir qoʻllab-quvvatlash chorasi yosh shaxmatchilarga tegishli. FIDE reytingida 1,5 mingdan ortiq ball toʻplagan sportchilarning xususiy shaxmat klublarida tahsil olishi uchun xarajatlarning yarmini davlat oʻz zimmasiga oladi.

Bundan tashqari, Oʻzbekistonda milliy brend ostida O‘zbekiston Grand chess xalqaro turnirlarini muntazam ravishda oʻtkazish rejalashtirilmoqda. Bu mahalliy shaxmatchilarga oʻz mamlakatida kuchli raqiblar bilan oʻynash imkoniyatini beradi.

Yosh iqtidorlarni izlab topishga alohida eʼtibor qaratiladi. Hududlar, tumanlar va mahallalarda qobiliyatli bolalarni erta aniqlash, ularni kuchli trenerlarga biriktirish va xalqaro turnirlarda muntazam ishtirok etishlari uchun sharoit yaratish koʻzda tutilgan. Shuningdek, xotin-qizlar shaxmati va parashaxmatni rivojlantirishning alohida tizimi yaratiladi.

Soʻnggi oʻn yil ichida 17 nafar oʻzbekistonlik shaxmatchi, jumladan, besh nafar ayol xalqaro grossmeyster unvonini oldi. Prezident hozirgi chempionlar hali juda yosh ekanini, ularning ortidan yuzlab va minglab iqtidorli bolalar voyaga yetayotganini taʼkidladi.

Avvalroq mamlakat oldiga FIDE reytingi boʻyicha dunyoning eng kuchli oʻnta davlati qatoriga kirish vazifasi qoʻyilgan edi. Mirziyoyevning soʻzlariga koʻra, bu maqsadga allaqachon erishilgan. U navbatdagi vazifani kengroq shakllantirdi — Yangi Oʻzbekistonni nafaqat olimpiya chempionlari yurtiga, balki jahon shaxmat markaziga aylantirish.