Xotin-qizlar uchun imtiyozli kvota bo‘yicha o‘tish ballari oshdi
2026-yilgi oliy ta’lim muassasalariga qabulda tavsiyanoma olgan ehtiyojmand xotin-qizlar uchun imtiyozli kvota bo‘yicha o‘tish ballari e’lon qilindi. Ayrim hudud va ta’lim sohalarida o‘tish ballari o‘tgan yilga nisbatan sezilarli oshgan bo‘lsa, boshqalarida pasayish qayd etildi. Eng katta o‘sish Sirdaryo viloyatida texnika yo‘nalishlarida kuzatildi - 49,2 ball.
Xotin-qizlar uchun imtiyozli kvota bo‘yicha o‘tish ballari ko‘tarildi. Bilim va malakalarni baholash agentligining rasmiy saytida imtiyozli toifadagi abituriyentlar uchun 2026-yilgi o‘tish ballari e’lon qilindi.
Ma’lumotlarga ko‘ra, tavsiyanoma olgan ehtiyojmand xotin-qizlar uchun ajratilgan kvota bo‘yicha ayrim hududlarda o‘tish ballari 2025-yilga nisbatan sezilarli darajada oshgan.
Eng katta o‘sish Sirdaryo viloyatining texnika sohasida kuzatildi. Bu yerda o‘tish bali o‘tgan yilga nisbatan 49,2 ballga ko‘tarilgan.
Shuningdek, Toshkent shahrida tibbiyot sohasi bo‘yicha o‘tish bali 44,5 ballga, Samarqand viloyatida texnika sohasida 34,1 ballga, Namanganda texnika sohasida 32 ballga oshgan.
Surxondaryo viloyatida texnika yo‘nalishlari bo‘yicha o‘sish 31,1 ballni, Navoiy viloyatida tibbiyot sohasida esa 28,1 ballni tashkil etgan.
Ayrim hududlarda esa, aksincha, o‘tish ballari pasaygan. Eng katta pasayish Jizzax viloyatining tibbiyot sohasida qayd etilgan – 31,1 ball. 2025-yilda ushbu yo‘nalishda o‘tish bali 119,1 ball bo‘lgan bo‘lsa, joriy yilda 88 balldan yuqori natija qayd etgan 63 nafar jizzaxlik abituriyent qiz grant asosida o‘qishga qabul qilingan.
Shuningdek, Toshkent shahrida texnika sohasi bo‘yicha o‘tish bali 29,8 ballga, Toshkent viloyatida tibbiyot bo‘yicha 27,1 ballga, Qoraqalpog‘istonda tibbiyot sohasida 26,6 ballga pasaygan.
Ayni paytda tavsiyanoma abituriyentning test natijasiga qo‘shimcha ball bermasligini eslatib o‘tish lozim. Ushbu imtiyoz belgilangan alohida kvota doirasida tanlovda ishtirok etish imkonini beradi.
Shu bois tavsiyanomaga ega abituriyent belgilangan o‘tish balidan past natija qayd etgan bo‘lsa, imtiyoz mavjudligi uni avtomatik ravishda talabalikka qabul qilishni anglatmaydi.