Xorazmda 100 million dollarlik chiqindidan elektr energiyasi ishlab chiqarish zavodi quriladi
Janubiy Koreyaning Green Hammer kompaniyasi Xorazm viloyatida maishiy chiqindilardan elektr energiyasi ishlab chiqaradigan zavod qurilishiga 100 million dollar investitsiya kiritadi. Korxona kuniga 800 tonna chiqindilarni qayta ishlash va 71 million kVt·soat elektr energiyasi ishlab chiqarish imkoniyatiga ega boʻladi. Loyihani 2026−2028 yillarda amalga oshirish rejalashtirilgan.
Xorazmda qiymati 100 mln dollarlik chiqindidan elektr energiyasi ishlab chiqarish zavodini qurish rejalashtirilmoqda
Xorazm viloyatida qiymati 100 million dollar boʻlgan qattiq maishiy chiqindilardan elektr energiyasi ishlab chiqarish korxonasini qurish koʻzda tutilmoqda. Bu Prezident Shavkat Mirziyoyevning 14 sentyabrdagi qarorida koʻzda tutilgan.
Janubiy Koreyaning Green Hammer Co., Ltd. kompaniyasi investor boʻladi. Zavod kuniga 800 tonna chiqindini qayta ishlash va 71 mln kVt·soat elektr energiyasi ishlab chiqarish imkoniyatiga ega boʻladi.
Loyihani 2026−2028 yillarda amalga oshirish rejalashtirilgan. Buning uchun koreyalik investor Oʻzbekistonda xorijiy korxona — loyiha kompaniyasini tashkil etadi.
14 sentyabr kuni Green Hammer va Oʻzbekiston hukumati nomidan Investitsiyalar, sanoat va savdo vazirligi oʻrtasida investitsiya shartnomasi imzolandi. Bundan oldin, 11 sentyabr kuni investor «Oʻzenergosotish» bilan ishlab chiqarilgan elektr energiyasini sotib olish toʻgʻrisida va Chiqindilarni boshqarish va tsirkulyar iqtisodiyotni rivojlantirish agentligi bilan qattiq maishiy chiqindilarni yetkazib berish toʻgʻrisida bitimlar tuzgan edi.
Qarorga muvofiq, loyiha kompaniyasi 30 yil davomida ishlab chiqarilgan elektr energiyasini «Oʻzenergosotish» kompaniyasiga kafolatli sotish imkoniyatiga ega boʻladi. Oʻz navbatida, «Oʻzenergosotish» ushbu elektr energiyasini xuddi shu muddat davomida milliy valyutada sotib olish majburiyatini oladi.
Chiqindilarni boshqarish agentligi ham 30 yil davomida korxonaga zarur hajmdagi qattiq maishiy chiqindilarni kafolatli yetkazib berishi kerak.
Investor qurilish davrida loyiha kompaniyasining majburiyatlari bajarilishini taʼminlash uchun birinchi darajali bankning 7 million dollarlik kafolatini taqdim etishi shart.
Loyiha kompaniyasi, shuningdek, elektr stantsiyasini yagona energetika tizimiga ulash uchun zarur boʻlgan elektr uzatish tarmoqlari va boshqa infratuzilmani oʻz hisobidan quradi. Obʼyektlar foydalanishga topshirilgandan soʻng ular «Oʻzbekiston milliy elektr tarmoqlari»ga topshiriladi.
Korxona chiqindilarni utilizatsiya qilish va qayta ishlashga ixtisoslashgan ekosanoat zonasida yoki unga tutash hududda joylashtiriladi.
Xorazm viloyati hokimligiga bir oy muddatda Urganch tumani «Yangi Oʻrtabogʻ» mahalla fuqarolar yigʻini hududidan Chiqindilarni boshqarish agentligiga 15 gektar yer maydoni ajratilishini taʼminlash topshirildi. Ushbu yer uchastkasi ekosanoat zonasini tashkil etish uchun doimiy foydalanish huquqi bilan beriladi.
Loyiha kompaniyasi va «Oʻzbekiston milliy elektr tarmoqlari»ga beriladigan yer uchastkalari uchun ijara toʻlovi yer soligʻi stavkasiga tenglashtiriladi.
Barcha soliqlar va yigʻimlar toʻlanganidan soʻng, loyiha kompaniyasi loyihani moliyalashtirish doirasida xorijiy banklarda hisobvaraqlar ochishi, kreditlar va valyuta mablagʻlarini olishi hamda ulardan foydalanishi mumkin boʻladi. Shuningdek, unga Oʻzbekistondagi bank hisobvaraqlari orqali toʻlovlarni amalga oshirmasdan, xorijiy pudratchilar, yetkazib beruvchilar va kreditorlar xizmatlari uchun toʻgʻridan-toʻgʻri haq toʻlashga ruxsat beriladi.
Jalb etiladigan xorijiy mutaxassislar uchun belgilangan tartibda kirish vizalari va ishga ruxsatnomalar rasmiylashtirilishi koʻzda tutilgan.
Eslatib oʻtamiz, Oʻzbekistondagi oltita chiqindi yoqish zavodidan ikkitasini 2026 yil yakuniga qadar ishga tushirish rejalashtirilgan. Bunga parallel ravishda rasmiylar qiymati 625 mln dollarlik yana beshta loyihani taqdim etdi. Yangi korxonalar chiqindilardan nafaqat elektr energiyasi ishlab chiqaradi, balki hosil boʻladigan kullarni ham qayta ishlaydi.