Xitoyda kemalar köproq, ammo AQŞ floti yirikroq: harbiy reytinglar nimani yaşiradi?
Xitoy harbiy xizmatçilar, tanklar va flotdagi birliklar soni böyiça yetakçi, AQŞ esa harbiy aviatsiya va flotning umumiy suv siğimi böyiça ustun. Global Firepower’ning 2026-yilgi baholari harbiy texnikaning soni uning jangovar imkoniyatlarini töliq aks ettirmasligini körsatadi.
Xitoyda kemalar ko‘proq, ammo AQSh floti yirikroq: harbiy reytinglar nimani yashiradi?
Visual Capitalist tayyorlagan infografikada davlatlar to‘rt mezon — amalda xizmat qilayotgan harbiylar, tanklar, harbiy uchish apparatlari va kemalar soni bo‘yicha taqqoslangan. Har bir ko‘rsatkichda yetakchi o‘rinlar turli davlatlarga tegishli.
Askarlar soni: Shimoliy Koreya AQShga yaqin
Global Firepower bahosiga ko‘ra, Xitoy 2,04 million nafar harbiy xizmatchi bilan dunyoda birinchi o‘rinda turadi.
E’tiborga molik taqqoslashlardan biri AQSh va Shimoliy Koreyaga tegishli: Amerika qurolli kuchlarida 1,33 million, KXDRda esa 1,32 million kishi xizmat qiladi.
Shimoliy Koreyaning katta armiyasi, avvalo, Koreya yarimorolida ehtimoliy quruqlik urushiga tayyorgarlik bilan bog‘liq. Yaponiyaning 2026-yilgi mudofaa «Oq kitobi»da KXDR qurolli kuchlarida quruqlik qo‘shinlari muhim o‘rin tutishi, ularning katta qismi Janubiy Koreya bilan chegaradagi demilitarizatsiya qilingan hudud yaqinida joylashgani qayd etilgan.
Tanklar soni ularning sifatini ko‘rsatmaydi
Tanklar soni bo‘yicha ham Xitoy birinchi o‘rinni egallagan. Shimoliy Koreya esa AQShni ortda qoldirib, uchinchi pog‘onaga joylashgan.
Britaniyaning Qirollik birlashgan mudofaa tadqiqotlari instituti — RUSI ma’lumotiga ko‘ra, KXDR zamonaviyroq texnika bilan bir qatorda, 1950–1960-yillardagi sovet ishlanmalari asosida yaratilgan tanklardan ham foydalanishda davom etmoqda.
Eski mashinalarni safda saqlash tanklar sonini yuqori darajada ushlab turishga yordam beradi. Biroq bunday hisob-kitobda zirh, nishonni aniqlash vositalari va qurollanishdagi farqlar aks etmaydi. Jang maydonida esa aynan shu xususiyatlar hal qiluvchi ahamiyat kasb etishi mumkin.
AQShning aviatsiyadagi ustunligi qayerdan keladi?
AQSh harbiy aviatsiyasida jami 13 032 ta uchish apparati bor. Bu reytingda undan keyingi to‘rt davlatning jami ko‘rsatkichidan ham ko‘p.
Bunday katta farq faqat jangovar samolyotlar hisobiga shakllanmagan. AQShning dunyoning turli nuqtalaridagi harbiy amaliyotlari qo‘shinlar va yuklarni okeanlar orqali tashish, shuningdek, aviatsiyani bazalardan uzoqda ta’minlashni talab qiladi. Buning uchun ko‘plab transport va havoda yonilg‘i quyish samolyotlari zarur.