Xitoy va Qirg‘iziston chegarasida 56 metrli avtomobil ko‘prigi quriladi
Xitoy va Qirg‘iziston chegarasida 56 metrli avtomobil ko‘prigi barpo etiladi
Qirg‘iziston-Xitoy chegarasidagi Bedel nazorat-o‘tkazish punktida Uzongu-Kuush daryosi ustidan doimiy avtomobil ko‘prigi qurish rejalashtirilmoqda. Ushbu bitim loyihasi Jogorku Keneshning Sanoat siyosati, transport, yoqilg‘i-energetika, me’morchilik va qurilish qo‘mitasi tomonidan tasdiqlandi.
Transport va kommunikatsiyalar vaziri o‘rinbosari Mombekov Baktiluu Asqar uluning aytishicha, ko‘prik Qirg‘iziston va Xitoy o‘rtasidagi transport aloqalarini rivojlantirish hamda chegara infratuzilmasini yaxshilash uchun zarur.
Bedel nazorat-o‘tkazish punkti 2024-yil sentyabr oyida ochilgan edi. Ayni paytda chegaradan transport harakati vaqtinchalik temir ko‘prik orqali amalga oshirilmoqda. Yangi rejaga ko‘ra, doimiy avtomobil ko‘prigining uzunligi 56 metr, eni esa 12 metr bo‘ladi.
Inshootning 28 metri Qirg‘iziston hududiga, qolgan 28 metri esa Xitoy tomoniga to‘g‘ri keladi. Bu ko‘prik alohida obyekt bo‘lmay, yangi transport yo‘nalishining tarkibiy qismiga aylanadi. Qirg‘iziston tomonida u 161 kilometr uzunlikdagi Barskun—Bedel avtomobil yo‘li bilan ulanadi.
Har ikki tomon o‘z hududidagi ko‘prik hamda unga olib boruvchi yo‘llar qurilishini o‘zi moliyalashtiradi. Dastlabki hisob-kitoblarga ko‘ra, ko‘prikning qiymati taxminan 940 ming dollarni tashkil etadi. Ammo yakuniy narx hali belgilanmagan. Bu loyiha-smeta hujjatlari to‘liq tayyor bo‘lgach aniqlanadi.
Mombekov Baktiluu taklif etilayotgan bitim, avvalo, loyihani amalga oshirish uchun huquqiy asos yaratishini ta’kidladi. Uzunligi taxminan 161 kilometr bo‘lgan Barskun—Bedel magistrali Qirg‘iziston va Xitoy o‘rtasidagi yangi transport koridori sifatida qurilmoqda.
Loyiha 50 dan ortiq ko‘prik, “Suk” hamda “Ashuu-Suu” nomli ikkita tunnel va boshqa muhandislik inshootlarini qamrab oladi. Asosiy qurilish ishlarini 2029-yilda yakunlash, yo‘lni esa 2030-yilda to‘liq foydalanishga topshirish rejalashtirilgan.
2025-yilgi respublika byudjetining ijrosi haqidagi hisobotga ko‘ra, qarz 1,4 milliard dollarni tashkil etmoqda. Respublika moliya vaziri o‘rinbosari qarzlarni bugunoq uzish mumkinligini aytdi. Biroq buni bosqichma-bosqich amalga oshirish ma’qulroq ekanini ta’kidladi.