Xitoy va Hindiston chegara hududlarida tinchlikni saqlashga kelishib oldi
Xitoy va Hindiston chegara hududlarida tinchlikni saqlashga kelishib oldi. Bu haqda Xitoy Tashqi ishlar vazirligi Pekinda bo‘lib o‘tgan yuqori darajadagi chegara muzokaralaridan so‘ng ma’lum qildi.
Ikki davlat o‘rtasidagi Himolay chegarasida tinchlik va osoyishtalikni saqlash, shuningdek, chegara masalasini adolatli va o‘zaro maqbul tarzda hal qilishga intilish yana bir bor tasdiqlandi. Muzokaralar yakunida 8 banddan iborat kelishuvga erishildi.
Kelishuvga ko‘ra:
* Chegara masalalari bo‘yicha qo‘mondonlar darajasidagi uchrashuvlar o‘tkaziladigan yana ikkita punkt tashkil etiladi.
* Chegaraning sharqiy va markaziy qismlarida ikkita yangi harbiy "ishonch telefoni" yo‘lga qo‘yiladi.
* Chegarani delimitatsiya qilish va uni boshqarish masalalarini ilgari surish uchun ikkita ishchi guruh tuziladi.
* Chegaraoldi savdosi va sayohatlarni rivojlantirish, chegara hududlarida muloqot, tinchlik va hamkorlik muhitini shakllantirishga kelishildi.
* Tomonlar sentyabr oyida transchegaraviy daryolar bo‘yicha ekspertlar darajasidagi navbatdagi muzokaralarni o‘tkazadi hamda gidrologik ma’lumotlar almashinuvi va tegishli memorandumlarni yangilash masalalarini muhokama qilishda davom etadi.
Muzokaralarda Xitoy tashqi ishlar vaziri Van I va Hindiston Milliy xavfsizlik maslahatchisi Ajit Doval ishtirok etdi. Ikki davlat o‘rtasidagi Himolay chegarasi uzoq yillardan beri bahsli bo‘lib kelmoqda.
Avvalroq XXR raisi Si Szinpin sentyabr oyida Nyu Dehlida bo‘lib o‘tadigan BRICS sammitida ishtirok etishi va yetti yil ichida ilk bor Hindistonga borishi mumkinligi haqida xabar berilgandi. Hindiston 12–13-sentyabr kunlari sammitga mezbonlik qiladi. Ikki davlat 2020-yildagi Himolay chegarasidagi to‘qnashuvlardan keyin bir necha yil harbiy qarama-qarshilikda bo‘lgan, 2024-yil oktabrida esa qo‘shinlarni ajratish bo‘yicha kelishuvga erishgan.