Si Szinpin 7 yil ichida ilk bor Hindistonga tashrif buyurishi mumkin
Si Szinpin yetti yildan so‘ng ilk bor Hindistonga borishi mumkin
Xitoy Xalq Respublikasi raisi Si Szinpin sentabr oyida Hindistonda bo‘lib o‘tadigan BRICS sammitida ishtirok etishi kutilmoqda. Bu uning so‘nggi yetti yil ichida Hindistonga birinchi tashrifi bo‘lishi mumkin. Reuters agentligi uch nafar hindistonlik manbaga tayanib xabar berishicha, bu tashrif ikki davlat o‘rtasidagi munosabatlarni yaxshilashga qaratilgan sa’y-harakatlar fonida muhim ahamiyat kasb etadi.
Hindiston 12–13-sentabr kunlari Nyu Dehlida BRICS sammitiga mezbonlik qiladi. Manbalarga ko‘ra, Xitoy rahbari Hindistonga taxminan 400 nafar amaldordan iborat delegatsiya bilan kelishi mumkin. Bu 2019-yildagi tashrifga nisbatan ikki baravardan ko‘proq ko‘rsatkichdir.
Xitoy va Hindiston o‘rtasidagi munosabatlar 2020-yilda Himolay tog‘laridagi chegara hududida yuz bergan to‘qnashuvlardan so‘ng bir necha yil davomida keskinlashgan edi. O‘sha to‘qnashuvlarda 20 nafar hindistonlik va 4 nafar xitoylik harbiy halok bo‘lgan. 2024-yil oktabr oyida tomonlar qo‘shinlarni chegara hududidan ajratish bo‘yicha kelishuvga erishgan bo‘lsa-da, chegara masalasi haligacha asosiy muammolardan biri bo‘lib qolmoqda. 2026-yil iyul oyining oxirida ikki davlat harbiy patrullari chegaraning chekka hududlaridan birida yuzma-yuz kelgani haqida xabarlar tarqalgan edi.
BRICS sammiti doirasida Xitoy va Hindiston rasmiylari iqtisodiy va boshqa yo‘nalishlarda hamkorlikni kengaytirish, shuningdek, chegara va mintaqaviy xavfsizlik masalalaridagi kelishmovchiliklarni boshqarish yo‘llarini muhokama qilishi kutilmoqda.
Xitoy Tashqi ishlar vazirligi Pekinning BRICS hamkorligiga katta ahamiyat berishini va sammitni muvaffaqiyatli o‘tkazishda Hindistonni qo‘llab-quvvatlashini bildirgan. Biroq, Si Szinpinning tashrifi bo‘yicha yakuniy ma’lumot hozircha berilmagan.
Eslatib o‘tamiz, Xitoy raisi Si Szinpin 2026-yil may oyi boshida Shimoliy Koreyaga davlat tashrifi bilan borgan edi. Tashrif davomida Kim Chen In bilan siyosat, iqtisodiyot va madaniyat sohalaridagi hamkorlikni kengaytirishga kelishib olingan.