Xitoy razvedkasi rahbari sunʼiy intellektni milliy xavfsizlikka tahdid deb atadi
Xitoy Davlat xavfsizlik vazirligi rahbari Chen Isin sunʼiy intellekt mamlakat milliy xavfsizligi uchun jiddiy xavf tugʻdirishi mumkinligidan ogohlantirdi. Uning soʻzlariga koʻra, xorijiy kuchlar undan axborot urushi, kiberhujumlar va maxfiy maʼlumotlarni yigʻishda foydalanmoqda.
Xitoy razvedkasi rahbari sunʼiy intellektni milliy xavfsizlik uchun xavf deb baholadi
Uning aytishicha, “dushman kuchlar” sunʼiy intellektdan siyosiy mish-mishlar va zararli maʼlumotlarni yoyish, shuningdek, Xitoyga qarshi “kognitiv urush” yuritish uchun foydalanmoqda. Chenning soʻzlariga koʻra, bunday texnologiyalar mamlakatning siyosiy, institutsional va mafkuraviy xavfsizligiga bevosita tahdid tugʻdiradi.
Shuningdek, u sunʼiy intellektning kiberhujumlar uchun imkoniyatlari kengayib borayotgani sababli muhim axborot infratuzilmasi ham xavf ostida ekanini taʼkidladi. Idora rahbari xorijiy maxsus xizmatlar davlat maʼlumotlari, tijorat sirlari va fuqarolarning shaxsiy maʼlumotlarini oʻz ichiga olgan maxfiy axborotni keng koʻlamda toʻplash uchun intellektual tizimlardan foydalanayotganini qayd etdi.
Chen sunʼiy intellektni global texnologik raqobatning asosiy yoʻnalishlaridan biri va yirik davlatlar oʻrtasidagi strategik raqobatning yangi maydoni deb atadi. U Xitoyni sunʼiy intellekt modellarini oʻqitish uchun zarur boʻlgan ilgʻor kompyuter chiplarini ishlab chiqarish kabi asosiy texnologiyalarda mustaqillikni taʼminlashga chaqirdi.
Bu ogohlantirish Xitoy raisi Si Jinping va AQSH prezidenti Jo Baydenning Vashingtondagi uchrashuviga tayyorgarlik koʻrilayotgan bir paytda yangradi. Xavfsizlik va sunʼiy intellektni tartibga solish masalalari muzokaralarning asosiy mavzularidan biri boʻlishi kutilmoqda.
Bir kun avval AQSH sobiq prezidenti Barak Obama, agar hukumat sunʼiy intellekt rivojini nazorat qilishning aniq qoidalarini ishlab chiqmasa, u xavfli tus olishi mumkinligi haqida ogohlantirgan edi.