Xitoy qarshi chiqdi, 21 davlat qoʻlladi: BMT Rossiyadagi inson huquqlari monitoringini uzaytirdi
BMT Inson huquqlari kengashi Rossiyadagi inson huquqlari holatini kuzatuvchi maxsus maʼruzachi mandatini yana bir yilga uzaytirdi. 6-oktabrdagi ovoz berishda 21 davlat qarorni qoʻllab-quvvatladi, besh davlat qarshi chiqdi, yana 21 davlat betaraf qoldi.
Xitoy qarshilik bildirdi, 21 davlat esa qoʻllab-quvvatladi: BMT Rossiyadagi inson huquqlari monitoringini yana uzaytirdi
Rezolyutsiya Yevropa Ittifoqi nomidan Irlandiya tomonidan taqdim etildi. Mamlakatning Jenevadagi BMT tuzilmalari huzuridagi doimiy vakili Lourens Simms Rossiyada inson huquqlari buzilishi uchun javobgarlik taʼminlanmayotganini qayd etdi.
Uning soʻzlariga koʻra, hokimiyat tanqidchilarining sudsiz qatl etilishi, siyosiy fikrlar xilma-xilligiga putur yetkazilishi, fuqarolik jamiyati, mustaqil OAV, jurnalistlar va tub xalqlarga nisbatan tizimli tazyiqlar jazosiz qolmoqda.
Maxsus maʼruzachi vakolatini uzaytirishni qoʻllab-quvvatlaganlar orasida Buyuk Britaniya, Chili, Fransiya, Italiya, Yaponiya va Janubiy Koreya bor.
Burundi, Xitoy, Kuba, Efiopiya va Vetnam qarorga qarshi ovoz berdi. Pekin kengashning boshqa aʼzolarini ham rezolyutsiyani rad etishga chaqirdi.
Braziliya, Hindiston, Meksika va Janubiy Afrika Respublikasi betaraf qolgan davlatlar safidan joy oldi. AFP agentligiga koʻra, Rossiya muhokama davomida soʻzga chiqmagan.
BMT Inson huquqlari kengashi Rossiya boʻyicha maxsus maʼruzachi lavozimini taʼsis etish haqidagi qarorni 2022-yil oktabrda qabul qilgan. Bunga Ukrainadagi urush fonida Rossiyada tazyiqlar kuchayayotgani haqidagi xavotirlar sabab boʻlgan.
Ushbu lavozimga bolgariyalik inson huquqlari eksperti Mariana Katsarova tayinlangan. U BMT Xavfsizlik kengashining besh doimiy aʼzosidan birida inson huquqlari holatini kuzatish vakolati berilgan ilk maxsus maʼruzachi boʻlgan.