Xitoy Oʻzbekistonga J-10 qiruvchi samolyotlari yetkazib berilishini tushuntirdi

Xitoy Oʻzbekistonga J-10 qiruvchi samolyotlari yetkazib berilishiga tushuntirish berdi

Xitoyning J-10CE koʻp maqsadli qiruvchi samolyotlarini Oʻzbekistonga yetkazib berishi hech qanday uchinchi mamlakatlarga qarshi qaratilmagan. Bu haqda XXR Mudofaa vazirligi rasmiy vakili Tszyan Bin maʼlum qildi.

Uning soʻzlariga koʻra, Xitoy va Oʻzbekiston oʻrtasidagi harbiy hamkorlik doʻstona ruhda rivojlanmoqda, qurol-yarogʻ yetkazib berish esa xalqaro huquq va shakllangan xalqaro amaliyotga mos keladi.

"Tomonlar oʻrtasida harbiy savdo sohasidagi hamkorlikning normal rivojlanishi xalqaro huquq va xalqaro amaliyotga mos keladi hamda biror-bir uchinchi tomonga qarshi qaratilmagan", — dedi Tszyan Bin.

Avgust oyida Oʻzbekiston Mudofaa vazirligi ilk bor mamlakat Harbiy-havo kuchlari qurollanishiga qabul qilingan J-10CE qiruvchi samolyotlari aks etgan videoni eʼlon qilgan edi.

Oʻzbekiston Pokistondan keyin ushbu modelning ikkinchi xorijiy buyurtmachisiga aylandi. Avvalroq J-10CE samolyotlariga Jazoir, Bangladesh, Misr, Indoneziya va Sudan ham qiziqish bildirgan edi. Xitoy bu yerda gap boshqa davlatlar bilan qarama-qarshilik haqida emas, balki mudofaa sohasidagi savdo haqida ketayotganini taʼkidlamoqda.