Xavo shari IES ishini buzdi va Toshkentda oʻchishlarga olib keldi
Toshkentning bir nechta tumanida elektr energiyasida qisqa muddatli uzilish yuz berdi. Bunga Qibray tumanidagi Aksa Tashkent IES hududiga havo shari tushishi oqibatida transformatorning shikastlangani sabab boʻldi. Video.
Havo shari IES ishini izdan chiqardi va Toshkentda uzilishlarga olib keldi
19 oktyabr kuni kechqurun Toshkent viloyatining Qibray tumanidagi Aksa Tashkent issiqlik elektr stantsiyasida transformatorning himoya tizimi ishga tushdi, shundan soʻng stantsiya quvvati 460 dan 185 MVtga tushib ketdi.
Transformatordagi nosozlik Toshkentning Yunusobod, Olmazor, Mirzo Ulugʻbek va Shayxontohur tumanlarining baʼzi hududlarida elektr energiyasi yetkazib berishda qisqa muddatli uzilishlarni keltirib chiqardi. Oʻzbekiston Energetika vazirligi elektr taʼminoti zaxira manbalari hisobidan taxminan yarim soat ichida tiklanganini maʼlum qildi.
Keyinchalik Energetika vazirligi uzilish IESning ochiq taqsimlash qurilmasiga uchib kelgan havo shari tushishi sababli yuz berganiga aniqlik kiritdi.
Eʼlon qilingan videoyozuvlarda kichik bir buyumning tushishi va chaqnash, shuningdek, yerda yotgan yorilgan qizil shar koʻrinadi.
Vazirlikda elektr stantsiyalari, podstantsiyalar va boshqa elektr qurilmalari yaqinida havo sharlarini uchirmaslikka chaqirishdi.
IES 2022 yil yanvar oyida Turkiyaning Aksa Enerji kompaniyasi tomonidan ishga tushirilgan edi. Kompaniyaning Oʻzbekistonda yana uchta stantsiyasi bor — Toshkent, Buxoro va Qashqadaryo viloyatlarida. Uning shoʻʼba kompaniyasi Aksa Elektric Samarqand viloyati elektr tarmoqlarini boshqarish boʻyicha tenderda gʻolib chiqdi va Toshkent, Sirdaryo hamda Jizzax viloyatlari elektr tarmoqlarini ham boshqaruvga olishni rejalashtirmoqda.