Vuchich serb biznesini Oʻzbekiston bilan faolroq hamkorlik qilishga chaqirdi
Vuchich serb biznesini Oʻzbekiston bilan faolroq hamkorlik qilishga chaqirdi
Serbiya Prezidenti Aleksandr Vuchich Oʻzbekistonning texnologik sohada jadal rivojlanayotganini taʼkidlab, serb tadbirkorlarini oʻzbek kompaniyalari bilan hamkorlikni kengaytirishga chaqirdi. U bu haqda Serbiya-Oʻzbekiston biznes-forumida maʼlum qildi.
Vuchichning soʻzlariga koʻra, Oʻzbekistonning texnologik parklar, sunʼiy intellekt va biotexnologiyalarni rivojlantirishdagi yutuqlari ayniqsa yaqqol koʻzga tashlanmoqda. U ushbu yoʻnalishlardagi qoʻshma loyihalar har ikki mamlakatning keyingi texnologik va sanoat oʻsishiga xizmat qilishi mumkinligini taʼkidladi.
«Mudofaa sanoatida ham katta imkoniyatlar mavjud», — dedi Serbiya yetakchisi ushbu sohadagi hamkorlik istiqbollarini koʻrsatib.
Vuchich, shuningdek, serb tadbirkorlarini oʻzbekistonlik hamkasblari bilan ishlashga chaqirib, ularni mehnatsevar, maqsad sari intiluvchan va ishonchli hamkorlar deb atadi.
Serbiya Prezidenti Shavkat Mirziyoyevga qoʻllab-quvvatlagani va hamkorlikka ochiqligi uchun alohida minnatdorlik bildirdi.
«Prezident Mirziyoyev biz uchun barcha eshiklarni ochdi», — dedi Vuchich ikki davlat oʻrtasidagi munosabatlarni rivojlantirishga qoʻshgan hissasini alohida qayd etib.
Yakunda Serbiya yetakchisi Serbiya Oʻzbekiston tajribasini oʻrganishi va rivojlanish masalalarida undan oʻrnak olishiga umid bildirdi.
«Serbiya va Oʻzbekiston doʻstligi yashasin!» — dedi Aleksandr Vuchich.
Avvalroq Mirziyoyev va Vuchich strategik sheriklik toʻgʻrisidagi hujjatlar paketini imzolagan edi.