Shavkat Mirziyoyev 7–8-sentyabr kunlari rasmiy tashrif bilan Serbiyada bo‘ladi
Shavkat Mirziyoyev 7–8-sentyabr kunlari rasmiy tashrif bilan Serbiyada bo‘ladi
Serbiya prezidenti Aleksandr Vuchichning taklifiga binoan Shavkat Mirziyoyev 7–8-sentyabr kunlari ushbu mamlakatga rasmiy tashrif bilan boradi.
Tashrif dasturiga ko‘ra, Belgrad shahrida oliy darajadagi muzokaralar hamda ikki davlatning rasmiylari va ishbilarmon doiralari vakillari qatnashadigan biznes forumi tashkil etiladi.
Kutilayotgan uchrashuvlar kun tartibida O‘zbekiston—Serbiya ko‘p qirrali sherikligini yanada mustahkamlash masalalari bor.
Savdo-iqtisodiy va investitsiyaviy hamkorlikni kengaytirish, shuningdek transport, mashinasozlik, yengil va oziq-ovqat sanoati, qishloq xo‘jaligi, farmatsevtika, axborot texnologiyalari kabi ustuvor yo‘nalishlarda qo‘shma loyihalarni amalga oshirishga alohida e’tibor qaratiladi.
Shuningdek, tartibli mehnat migratsiyasi sohasida hamkorlikni yo‘lga qo‘yish, hududlararo va madaniy-gumanitar aloqalarni kengaytirish masalalari ham muhokama qilinadi.
Sammit yakunida hukumatlararo va idoralararo kelishuvlarning salmoqli to‘plami qabul qilinishi rejalashtirilgan.