Vengriyada qabr qazish bo‘yicha xalqaro chempionat bo‘lib o‘tdi (video)

**Vengriyada qabr qazish bo‘yicha xalqaro chempionat o‘tkazildi (video)**

Vengriyadagi qabristonlardan birida qabr qazish bo‘yicha xalqaro musobaqa tashkil etildi. Bu noodatiy tuyulishi mumkin, biroq 5-sentyabr kuni 38 nafar ishtirokchi qo‘liga ketmon va belkurak olib bellashdi.

Musobaqani Vengriya qabristonlarni saqlash va ularga xizmat ko‘rsatish assotsiatsiyasi uyushtirdi. Uning maqsadi go‘rkovlik kasbi va uning mahoratini namoyish etish, shuningdek, o‘limga oid qarashlarni o‘zgartirishdan iborat.

Vengriyaning shimolidagi Nyergeshujfalu shahri qabristonidagi quruq va issiq tuproq 19 ta jamoa uchun jiddiy sinov bo‘ldi. Ikki kishidan iborat jamoalar eng tez va eng chiroyli qabr qazish uchun bor kuchi bilan ishladi.

“Bu yerda go‘zallik emas, tezlik asosiy o‘rinda”, dedi g‘olib juftlik vakili Robert Nad o‘z jamoadoshi Laslo Kish bilan birga.

“Dafn marosimi uchun qabr qaziyotganingizda uning aniq o‘lchamlariga juda e’tiborli bo‘lishingiz va chiroyli chiqishini ta’minlashingiz kerak”, deya qo‘shimcha qildi u.

Musobaqa qoidalariga ko‘ra, qabr chuqurligi 1,6 metr, uzunligi 2 metr va kengligi 0,8 metr bo‘lishi kerak edi. G‘olib jamoa qabrni 1 soat-u 21 daqiqada qazib, muvaffaqiyat qozondi. G‘oliblar 200 ming vengriya forinti (taxminan 640 dollar) miqdoridagi pul mukofotini bo‘lishib oldi.

Xavfsizlik nuqtayi nazaridan, har bir jamoadan faqat bir kishi bir vaqtning o‘zida qabr ichida ishlashi mumkin edi. Jamoaning ikkinchi a’zosi qazib olingan tuproqni tozalashi va tartibga solishi mumkin edi. Biroq unga qabr ichiga kirishga ruxsat berilmaydi.