Uyingizda oʻtiring
Rossiya MDH mamlakatlari oʻrtasida mahkumlarni topshirish jarayonini optimallashtirishni talab qilmoqda
Uyingizda oʻtiring
Rossiya Adliya vaziri Konstantin Chuychenko MDH mamlakatlarida mahkumlarni jazoni oʻtash uchun vataniga topshirish tartib-taomillarini optimallashtirishga chaqirdi.
«Rossiya Adliya vazirligi mahkumlarni oʻzlari fuqarosi boʻlgan davlatlarga topshirish tartib-taomillarini optimallashtirish ustida tizimli ravishda ishlamoqda. Bizning umumiy maqsadimiz — idoralararo kelishish va topshirish jarayonini imkon qadar tezkor, aniq va ochiq qilishdir», — dedi vazir oʻtgan haftada Armaniston, Belarus, Qozogʻiston, Qirgʻiziston, Rossiya, Tojikiston va Oʻzbekiston vakillari ishtirokida oʻtkazilgan MDHga aʼzo davlatlar penitentsiar xizmatlari rahbarlari Kengashining XI yigʻilishi ochilishida videokonferentsaloqa orqali soʻzlagan nutqida.
Chuychenko MDHga aʼzo davlatlar bilan tegishli xalqaro shartnomalar imzolanganini taʼkidladi.
Adliya vazirligi rahbari, shuningdek, ozodlikdan mahrum etishga hukm qilinganlarni jazoni oʻtash uchun vataniga topshirish amaliyoti «muhim insonparvarlik ahamiyatiga ega ekanini, axloqan tuzatish taʼsirining yanada samarali boʻlishiga xizmat qilishini, uning qarindoshlari bilan ijtimoiy aloqalarini tiklash va mustahkamlashga hamda ozodlikka chiqqanidan keyin resotsializatsiyalashuviga yordam berishini» qayd etdi. Chuychenkoning soʻzlariga koʻra, bularning barchasi jazoning asosiy maqsadiga — yangi jinoyatlarning oldini olish va jamoat xavfsizligini taʼminlashga erishish imkonini beradi, deb xabar beradi TASS.