Uydan chiqib ketganimda taom tayyorlashni bilmasdim – lekin 2,50 funtlik ushbu oson retseptlar mening eng sevimli taomlarimga aylandi
Ilgari taom tayyorlashni bilmagan talabalar har bir kishi oʻrgana olishi mumkin boʻlgan toʻrtta arzon taom retsepti bilan boʻlishdi.
Uydan chiqqanimda ovqat pishirishni bilmasdim – lekin 2,50 funtlik ushbu oson retseptlar eng sevimli taomlarimga aylandi
Mianing aytishicha, u tayyor mahsulotlardan voz kechib, oʻzi ovqat pishirishni boshlaganidan keyin oziq-ovqat xaridlaridan haftasiga 20 funt tejab qolgan
Mia Jons universitetda oʻqish uchun Anglsidan Londonga koʻchib oʻtganida, ovqat pishirishni «umuman» bilmasligini aytadi – lekin tez orada buni oʻzgartirish kerakligini tushunib yetgan.
«Umrimning oxirigacha faqat makaron yeb yashay olmasdim», deydi u. Tayyor ovqatlar va tez tayyorlanadigan lagʻmonlar esa uyilib qola boshlagan edi.
«Oziq-ovqatga haftasiga 45 funt sarflardim», deydi 22 yoshli qiz. «Bu juda qimmatlik qilardi».
Shuning uchun u yangi mahsulotlar sotib olishni boshladi. «Keyin esa: 'Oh, endi ovqat pishirishni oʻrganishim kerak', deb oʻylab qoldim».
U gʻoyalar va retseptlar olish uchun ijtimoiy tarmoqlardagi videolarni tomosha qila boshladi va oʻziga yoqmagan masalliqlarni boshqasiga almashtirdi.
Mianing aytishicha, ovqat pishirishni oʻrganish «unga mustaqil yashay olishini anglashga yordam bergan»
Boshida bir nechta muvaffaqiyatsizliklar boʻlgan boʻlsa-da, koʻp oʻtmay Mia ovqatni ishonch bilan pishira olishini aytadigan darajaga yetdi.
«Bu menga mustaqil hayot kechira olishimni va yolgʻiz yashay olishimni anglatdi», deydi u.
«[Birinchi kursdagi] men bularning barchasiga ishonmagan boʻlardim».
Eng yaxshisi, Mia haftalik oziq-ovqat xarajatlarini 20 funtga qisqartirdi va oʻzida kuch-quvvat koʻpayganini sezdi.
«Maʼruzalarda oʻzimni ancha tetik his qila boshladim, bu juda foydali boʻldi», deydi u.
Hozirda magistrlik darajasini tamomlagan Mia xuddi shunday vaziyatdagi boshqa talabalarga yordam berish umidida oʻz retseptlarini internetda baham koʻrmoqda.
Bir vaqtlar oshxonada qiynalgan Mia va boshqa talabalar arzon, oddiy va eng muhimi, mazali boʻlgan, oʻzlari oʻrgangan taomlar retseptlari bilan boʻlishdilar.
Ushbu retseptlarning barchasini 13 funtdan kamroq mablagʻ evaziga asosiy mahsulotlar zaxirasini yaratib tayyorlash mumkin. Har bir taom uchun esa 2,50 funtdan kam boʻlgan qoʻshimcha masalliqlar kerak boʻladi – ulardan bir nechta portsiya chiqadi, bu esa keyingi kunga olib qoʻyish yoki muzlatish uchun juda qulay.
Mianing birinchi retsepti – noʻxatli karri: «Bu juda arzon va juda toʻyimli», deydi u.
Ikkinchisi – udon lagʻmoni. «Bu 10 daqiqalik retsept, uni [tofu yoki tovuq goʻshti bilan] osongina moslashtirish mumkin va ish kunlaridagi kechki ovqat uchun juda foydali». Mia agar oʻzgacharoq taʼm xohlasa, chili yogʻi qoʻshishini aytadi.
Mia taomga chili yogʻi va kunjut urugʻlari kabi qoʻshimchalarni qoʻshishni tavsiya qiladi
Mia kabi Jayda Otuo-Mensah ham universitetga kirgunga qadar «unchalik ovqat pishirmagan».
Fizioterapiya yoʻnalishi talabasi shifoxonalardagi amaliyotga haftasiga qariyb 40 soat vaqt sarflash bilan birga, sogʻlom taomlar tayyorlashni oʻrganishni xohlagan.
«Oʻzing ovqat pishirganingda juda oson boʻladi, chunki ichiga nima solinayotganini aniq bilasan», deydi u.
«Men tovuqli burger yeyishim mumkin va u pishirish usulim tufayli juda sogʻlom boʻladi».
Jayda ovqat pishirishni TikTok videolarini kuzatib oʻrganganini aytadi
Koventri universitetining 20 yoshli talabasi TikTok videolaridan foydalanib, «koʻplab sinov va xatolardan» soʻng, oʻzining ovqat pishirish jarayonini videoga olishga yetarlicha ishonch hosil qildi.
Endi u asosiy mahsulotlarni sotib oladi va haftalik taomnoma rejasiga amal qilishga harakat qilsa-da, asosan koʻngli tusagan ovqatni pishiradi.
Jayda eng koʻp tayyorlaydigan taomlardan biri – tako.
«Bu oʻrganish uchun ajoyib taom; tez va hamyonbop», deydi u.
Rob Medhurstning aytishicha, talabalarning klassik taomi boʻlgan spagetti bolonyeze yanada murakkabroq taomlarni tayyorlash uchun poydevor boʻlgan.
«Bu juda hamyonbop va oson», deydi Nottingem Trent universitetining 25 yoshli bitiruvchisi.
«Baʼzi odamlar ovqat pishirish sanʼatini yaxshi koʻrishini bilaman, lekin shaxsan men unday emasman», deydi Rob
«Men taomlarni oldindan tayyorlab qoʻyish va portsiyalab pishirish men uchun eng yaxshi usul ekanligini tez fursatda tushunib yetdim», deydi u.
«Baʼzi odamlar ovqat pishirish sanʼatini yaxshi koʻrishini bilaman, lekin shaxsan men unday emasman».
Rob oddiy spagetti bolonyezeni moslanuvchan retsept deb topdi: «Chili yoki koʻplab burritolar uchun bir-ikkita narsani oʻzgartirishingiz kifoya».
Uning aytishicha, u ushbu retseptni shu qadar koʻp marta tayyorlaganki, buni «mushak xotirasi» deb ataydi.
Buni tayyorlayotganda qirgʻichdan oʻtkazilgan pishloq kabi qoʻshimchalarni ham qoʻshishingiz mumkin
Shef-oshpaz va pazandachilik kitoblari muallifi Kler Tompson qizi Greys universitetga oʻqish uchun uydan ketayotganida: «U haqiqatan ham ovqat pishira oladimi?» deb oʻylaganini eslaydi.
U Greysni uch quti oziq-ovqat zaxirasi bilan joʻnatgan, qizi buni «har ehtimolga qarshi, biror narsa notoʻgʻri ketsa, apokalipsisga tayyorgarlik» deb taʼriflagan.
Shef-oshpaz va pazandachilik kitoblari muallifi Kler Tompsonning aytishicha, tez va oson taomlar tayyorlash uchun har bir kishiga zarur boʻlgan asosiy mahsulotlar zaxirasi mavjud
Biroq Klerning fikricha, uydan chiqayotganda har bir kishi gʻamlab qoʻyishi kerak boʻlgan baʼzi zarur narsalar bor.
«Menimcha, ziravorlar – bu boshlash uchun juda yaxshi narsa», dedi u BBC World Service'ning The Food Chain podkastiga bergan intervyusida.
«Ular juda kam pul evaziga juda koʻp taʼm beradi va javoningizda uzoq vaqt yaxshi saqlanadi», deydi u.
«Tomat sousiga bir banka noʻxat qoʻshib, uni makaroningizga solsangiz, siz juda arzon taomga juda yaxshi darajadagi protein va ozuqaviy moddalarni qoʻshgan boʻlasiz».