Ukraina Wildberries’ga, Rossiya kitob bozoriga zarba berdi
Ukraina dronlari 16-avgustga o‘tar kechasi Rossiyaning 16 regioni va Qrimga hujum qildi. Rossiya mudofaa vazirligiga ko‘ra, havo hujumidan mudofaa kuchlari jami 822 ta dronni to‘xtatgan.
Ukraina Wildberries’ga, Rossiya kitob bozoriga zarba berdi
16-avgustga o‘tar kechasi Ukraina dronlari Rossiyaning 16 hududi va Qrimga hujum qildi. Rossiya mudofaa vazirligining xabariga ko‘ra, havo hujumidan mudofaa tizimlari jami 822 ta dronni to‘xtatgan.
Rostov viloyatida ushbu hujum natijasida besh kishi halok bo‘ldi. Viloyat rahbari Yuriy Slyusarning so‘zlariga ko‘ra, havo hujumidan mudofaa kuchlari viloyatning uchta shahri va to‘qqizta tumanida 150 dan ortiq dron va raketalarni urib tushirgan.
Ukraina Qurolli Kuchlari Bosh shtabi Rostov viloyatining Kamensk-Shaxtinskiy shahridagi "Kamenskiy" kombinatiga zarba berilganini ma’lum qildi. Bu korxona Rossiya mudofaa-sanoat kompleksining "Uragan", "Smerch" va "Tornado-S" kabi baravar o‘t ochish reaktiv tizimlari, shuningdek, boshqa bir qator raketa tizimlari va aviatsiya vositalari uchun qattiq yoqilg‘i ishlab chiqaradi.
Poytaxt meri Sergey Sobyaninning ma’lum qilishicha, 15-avgust oqshomidan 16-avgust tongiga qadar Moskva viloyati yo‘nalishida 600 ta dron uchirilgan. Uning so‘zlariga ko‘ra, 201 ta dron Moskva viloyati hududida urib tushirilgan. Moskva viloyati gubernatori Andrey Vorobyov tunda havo hujumidan mudofaa kuchlari Domodedovo, Podolsk, Stupino, Odintsovo, Naro-Fominsk, Ramensk, Chexov, Kolomna, Kashira va Yegoryevskda 187 ta dronni to‘xtatganini ma’lum qilgan.
Podolskda dron kelib urilishi natijasida Wildberries’ning "Koledino" sanoat parkidagi ombori yonib ketgan. Bu majmuaga kamida ikkinchi bor hujum qilinmoqda. Avvalgi hujum 20-iyul kuni sodir bo‘lgan edi. O‘shanda kompaniya ishchilar orasida jabrlanganlar yo‘qligi va majmua odatiy rejimda ishlashda davom etayotganini ma’lum qilgan edi. Endi esa kompaniya matbuot xizmati ob’yektdagi yong‘in tufayli logistika zanjiri qaytadan tuzib chiqilganini xabar qildi.
Ukrainadagi monitoring kanallari ombordagi yong‘in ko‘lami va ko‘tarilgan quyuq tutun aks etgan videolarni e’lon qildi. Ukraina Mudofaa vazirligining ma’lum qilishicha, mamlakat qurolli kuchlari Wildberries’ning eng yirik 10 ta logistika markazlaridan yettitasini ishdan chiqargan, Koledinodagi ombor esa maydoni bo‘yicha eng yirigi bo‘lgan – 250 ming kvadrat metr. "Agentstvo" nashri ham iyul oyida Elektrostaldagi majmua yonib ketganidan keyin Koledinodagi ombor Wildberries’ning eng yirik logistika markazi bo‘lib qolganini yozgan edi.
Elektr uzatish liniyalari shikastlanishi natijasida Podolsk okrugidagi sakkizta aholi yashash punktida 110 ta xususiy uy elektrsiz qolgan.
Domodedovoda Ukraina dronlari hujumidan keyin dori-darmonlar saqlanadigan omborda yong‘in chiqqan. Okrug rahbari Yevgeniya Xrustaleva yong‘in qurshab olinganini, ammo 56 ming kvadrat metr maydondagi ombor vayron bo‘lganini ma’lum qilgan.
Moskva viloyatida tungi hujum natijasida 83 yoshli erkak halok bo‘lib, kamida uch kishi yaralangan. Shuningdek, Moskva avtomobil halqa yo‘li (MKAD) hududida uch kishi jarohatlangan (bu haqda Sobyanin xabar bergan, ammo tafsilotlarni keltirmagan).
**Ukraina**
Rossiya ham tunda Kiyevga, shuningdek, Dnipropetrovsk va Poltava viloyatlariga zarbdor dronlar va raketalar bilan hujum qildi.
Kiyevda "Pochayna" metro bekati atrofidagi kitob bozori zarba ostida qolgan. Hujum natijasida bir necha qatordagi savdo pavilyonlari yonib ketgan. To‘qimachilik mahsulotlari, zargarlik buyumlari, kiyim-kechak va poyabzal sotiladigan boshqa do‘konlar ham zarar ko‘rgan. "Suspilne" telekanali xabar berishicha, metro bekatiga kirish joyi ham shikastlangan.
Bu yerda kitob do‘koni qariyb 30 yildan buyon mavjud edi. Uning rasmiy ochilish sanasi 1997-yil 1-mart kuni deb belgilangan. Avvaliga bozor xuddi shu nomdagi metro bekati sharafiga Petrovka deb nomlangan, ammo keyinchalik u dekommunizatsiya doirasida qayta nomlangan. "Hech kimning hech narsasi qolmadi... Hammasi yonib ketdi. Maktab o‘quvchilari uchun chet tili [darsliklari] sotilgan. Hamma darslik olishi uchun sentyabrni kutayotgandik... Ammo bu voqea sodir bo‘ldi", – deydi hujumdan jabr ko‘rgan kitob do‘koni egasi Natalya Hromadske nashriga.
Krivoy Rogda "ArselorMittal" kon-metallurgiya korxonasi raketa hujumiga uchragan. Bir kishi halok bo‘lib, yana 13 nafar ishchi jarohat olgan. Korxonadagilar hujum natijasida asosiy ishlab chiqarish ob’yektlariga zarar yetganini ma’lum qildi. Ishlab chiqarish jarayonlari qisman to‘xtatilgan. "Ta’kidlaymizki, korxonamiz kon-metallurgiya sanoatidagi fuqarolik ob’yekti hisoblanadi", – deyiladi xabarda.
Keyinroq Dnipropetrovsk viloyati harbiy ma’muriyati rahbari Oleksandr Ganja aniqlik kiritib, tungi hujum natijasida ikki kishi halok bo‘lgani va 14 kishi jarohatlanganini ma’lum qildi. Shundan 11 kishi shifoxonaga yotqizilgan.
Rossiya Mudofaa vazirligi Kiyevda "Flamingo" qanotli raketalari uchun butlovchi qismlar, jangovar qismlar va qattiq yoqilg‘ili tezlatgichlar hamda zarbdor dronlar uchun butlovchi qismlar ishlab chiqaruvchi "Fayer Point" sanoat korxonasiga zarba berilganini ma’lum qilgan. Ta’kidlanishicha, Krivoy Rogda qurol-yarog‘ va harbiy texnika ishlab chiqarish uchun po‘lat prokat ishlab chiqaradigan metallurgiya kombinati sexlari nishonga olingan. Bundan tashqari, Poltava viloyatidagi Kremenchug neftni qayta ishlash zavodiga hujum uyushtirildi, deyiladi Rossiya harbiy idorasi ma’lumotida.