Ukraina Moskva oblastidagi omborlarga hujum qildi
Tun bo‘yi Moskva tomon 600 ta dron uchirilgan. Rostov oblastida raketa va dronlar hujumi oqibatida besh kishi halok bo‘lgan.
Ukraina Moskva viloyatidagi omborlarga hujum qildi
16-avgustga o‘tar kechasi Ukraina dronlari Moskva shahri, Moskva va Rostov viloyatlariga keng ko‘lamli hujum uyushtirdi, natijada qurbonlar va jarohatlanganlar bor.
Moskva viloyati gubernatori Andrey Vorobyovning ma’lum qilishicha, bu hudud so‘nggi paytlardagi eng jiddiy zarbaga uchragan. Tun davomida havo hujumidan mudofaa kuchlari Domodedovo, Podolsk, Stupino, Odintsovo, Naro-Fominsk, Ramensk, Chexov, Kolomna, Kashira va Yegoryevskda jami 187 ta dronni urib tushirgan.
Ramensk munitsipal okrugida dronlardan birining xususiy uy hududiga qulashi oqibatida 83 yoshli erkak halok bo‘lgan. Podolskda uch kishi jarohatlangan. Shuningdek, Klimovskda, "Lesnoy" bog‘dorchilik xo‘jaligida (qaysi rayonda ekanligi aniqlashtirilmagan) va Jeleznodorojniy posyolkasida yana uch kishi jabrlangan.
Podolsk shahrida dron zarbasi natijasida Wildberries’ning "Koledino" sanoat zonasi hududidagi ombori yonib ketdi. Viloyat gubernatorining so‘zlariga ko‘ra, xodimlar zarbadan oldin boshpanalarga evakuatsiya qilingani sababli hech kim jabrlanmagan. Telegram-kanallarda ombor hududida kuchli yong‘in va osmonga ko‘tarilgan qalin tutun aks etgan videolar e’lon qilingan.
Kompaniya matbuot xizmati Podolskdagi logistika ob’yektida yong‘in chiqqanini tasdiqlab, u yerda o‘z vaqtida evakuatsiya ishlari amalga oshirilganini ma’lum qildi. Hozirda u yerga yangi yuklar olib borilmayapti va u yerdan yuklar olib chiqilmayapti – logistika zanjirlari qayta tuzilgan.
"Koledino" sanoat zonasi hududidagi ombor (250 ming kvadrat metr) Wildberries’ning 10 ta eng yirik logistika markazlaridan biri bo‘lib, shu vaqtgacha ukrainlar zarbasi oqibatida ishdan chiqqan yettinchi yirik omborga aylandi. Endi kompaniyaning yirik omborlari maydonlarining atigi 20 foizi faoliyatini davom ettirmoqda.
Domodedovoda esa hujum natijasida dori-darmon ombori yonib ketdi, deb xabar berdi Vorobyov. Dastlabki ma’lumotlarga ko‘ra, jabrlanganlar yo‘q. Okrug rahbari Yevgeniya Xrustaleva yong‘in qurshab olinganini va u 56 ming kvadrat metr maydonni qamrab olganini qayd etdi. Bundan tashqari, Kashirada politsiya boshqarmasining yangi binosi, Voskresenskda esa sanoat ob’yektining ayrim inshootlari shikastlangan.
15-avgust oqshomidan beri Moskva tomon 600 ta dron uchirilgan, degan poytaxt meri Sergey Sobyanin. Uning so‘zlariga ko‘ra, Moskva viloyati hududida 201 ta dron yo‘q qilingan. Hujumlar natijasida Moskva avtomobil halqa yo‘li (MKAD) hududida uch kishi jarohatlangan. Sobyaninning xabarida bu qanday ro‘y bergani bo‘yicha tafsilotlar keltirilmagan.
Bundan tashqari, Ukraina qurolli kuchlari Rostov viloyatiga ham hujum qildi. Hudud gubernatori Yuriy Slyusar besh kishi halok bo‘lib, yana bir kishi jarohat olgan holda shifoxonaga yotqizilganini ma’lum qildi. Uning so‘zlariga ko‘ra, havo hujumidan mudofaa kuchlari uchta shahar va to‘qqizta rayonda 150 dan ortiq dron va raketalarni yo‘q qilgan.
Rossiya mudofaa vazirligi tunda havo hujumidan mudofaa kuchlari 16 ta region va anneksiya qilingan Qrim osmonida Ukrainaning 822 ta droni yo‘q qilingani haqida bayonot bergan. Harbiy idora bayonotida raketa hujumi haqida so‘z ketmagan.