Ukraina Peterburg boʻylab eng yirik hujumini amalga oshirdi – suratlar
Dronlar hujumi oqibatida neft terminali, koʻprik, Ozon ombori va VK data-markazida yongʻinlar chiqqan. Bir kishi halok boʻlib, 15 kishi yaralangan.
Ukraina Peterburgga eng yirik hujumini uyushtirdi – suratlar
18-oktabrga o‘tar kechasi Sankt-Peterburg shahri va Leningrad oblasti dronlarning yirik hujumiga duch keldi.
Peterburg gubernatori Aleksandr Beglov Peterburg neft terminali va «Ruchi» neft bazasiga dronlar zarbasi oqibatida yong‘inlar chiqqanini tasdiqladi. Hujum paytida 12 ta ko‘p qavatli uy va ikkita xususiy uy ham zarar ko‘rgan. Bir kishi halok bo‘lib, besh kishi jarohatlangan, ularning barchasi shifoxonaga yotqizilgan.
Shuningdek, Ozon kompaniyasining Peterburgdagi ombori (u yerda yong‘in chiqqan, xodimlar jabrlanmagan) hamda «VKontakte»ning shahar tashqarisidagi data-markazi ham zarba ostida qolgan.
Bundan tashqari, shaharda kemalar o‘tishiga moslashtirilgan osma ko‘prik hamda «Vostochnaya» elektr nimstansiyasi, shuningdek, Vasilevskiy orolidagi narkologiya shifoxonasi ham hujumga uchragan.
Hujum vaqtida Peterburgning bir qancha rayonlari elektr ta’minotisiz qolgan. Pulkovo aeroporti vaqtincha yopilib, yo‘lovchilar va xodimlar bombapanagohlarga olib tushirilgan. Hozirga kelib aeroportda reyslarni jo‘natish va qabul qilish tiklangan.
Leningrad oblastida ham avariyali o‘chish yuz berib, 20 mingdan ortiq kishi tokdan uzilgan.
Peterburg shahri va Leningrad oblastida o‘nlab avtomobillar va uylar shikastlangan, bir kishi halok bo‘lib, 15 kishi jarohatlangan.
Rossiya mudofaa vazirligi hisobotiga ko‘ra, tunda mamlakat bo‘ylab 1015 ta dron urib tushirilgan yoki to‘xtatilgan.