Ukraina IKAOni Rossiya uzra parvozlar xavfsizligiga tahdidlar haqida xabardor qildi
Ukraina Transport vazirligi Rossiya aeroportlarida reyslarning ommaviy ravishda kechiktirilishi fonida ICAOga Rossiya uzra parvozlardan voz kechishga chaqiruvchi xat yoʻlladi.
Ukraina ICAOga Rossiya uzra parvozlar uchun xavf-xatarlar toʻgʻrisida xabar berdi
Ukraina infratuzilma vaziri Nikolay Kalashnik Xalqaro fuqaro aviatsiyasi tashkiloti (ICAO) bosh kotibi Xuan Karlos Salazar Gomesga xat yoʻllab, unda Rossiya hududi uzra parvozlar xavfli ekanidan ogohlantirdi.
Ukraina tomoni tashkilotga aʼzo mamlakatlarning aviatsiya rasmiylari va aviakompaniyalarini qoʻshimcha xavfsizlik choralarini koʻrishga, jumladan, Rossiya hududi uzra parvozlardan butunlay voz kechishga chaqirdi.
Kalashnik oʻz xatida Ukraina BMT Nizomining 51-moddasida nazarda tutilgan oʻzini himoya qilish huquqi doirasida harakat qilayotganini koʻrsatib oʻtdi va eskalatsiya fonida fuqarolik havo kemalarining Rossiya havo hududida boʻlishi yuqori xavf-xatarlar bilan bogʻliq boʻlishi mumkinligini taʼkidladi.
Ukraina Tashqi ishlar vaziri Andrey Sibiga ICAOga bildirishnoma yuborilganini tasdiqladi va Rossiya havo hududidan foydalanishdan qochishga chaqirdi. U Kiyev ICAO, aviakompaniyalar va hukumatlarni ehtiyotkorlik choralarini koʻrish zarurligi haqida xabardor qilayotganini hamda kutilmagan hodisalarning oldini olishga intilayotganini maʼlum qildi.
Ukraina Prezidenti Vladimir Zelenskiy avvalroq Rossiya uzra «osmonni yopish» niyatida ekanini bayon qilgan va aviakompaniyalarni parvozlar uchun xavflar ortishi mumkinligidan ogohlantirib, Rossiya havo hududida dronlardan foydalanish davom ettirilishini taʼkidlagan edi.
Rossiya Prezidenti Vladimir Putin bunga javoban ushbu bayonotlarni «davlat terrorizmiga daʼvo» deb atadi. Rossiya Transport vaziri esa Rossiya aviatsiya xizmatlari fuqaro aviatsiyasi ishida jiddiy uzilishlar boʻlishiga yoʻl qoʻymasligini bildirdi.
2 sentyabrga oʻtar kechasi Sheremetyevo, Domodedovo va Vnukovo aeroportlarida reyslarning ommaviy ravishda kechiktirilishi va bekor qilinishi yuz berdi — kamida 77 ta reys kechiktirilgani yoki bekor qilingani xabar qilindi: Sheremetyevoda 40 ta, Domodedovoda 20 ta va Vnukovoda 17 ta.
Domodedovoda Antaliyadan kelayotgan reys keyingi kunga koʻchirildi, Sheremetyevoda Sochiga parvoz deyarli olti soatga kechiktirildi, Vnukovoda esa Sochi va Sharm-ash-Shayxga reyslar taxminan olti soatga kechikdi.
Turkiyaning Pegasus aviakompaniyasi ham reyslarini bekor qildi: Bodrumdagi yoʻlovchilar uchishni 10 soatdan ortiq kutishdi, shundan soʻng ularga Turkiya tomoni havo hududidagi vaziyat tufayli uchishlarni taqiqlagani maʼlum qilindi.
Shu bilan birga, Oʻzbekistonning Uzbekistan Airways va Centrum Air aviakompaniyalari Rossiyaga reyslarni odatiy tartibda amalga oshirishda davom etmoqda.
Davlat dumasining Mudofaa boʻyicha qoʻmitasi raisining birinchi oʻrinbosari Aleksey Juravlev Zelenskiyni tinch aholiga tahdid qilishda ayblab, Rossiya havo hududida yoki aeroportida boʻlgan fuqarolik samolyoti bortida turli mamlakatlar fuqarolari boʻlishi mumkinligini aytdi.
Juravlev, shuningdek, Ukraina prezidentini jismonan yoʻq qilishga chaqirdi va taxmin qilinayotgan hujumlarga tayyorgarlikni toʻxtatish uchun har qanday vositalarni, jumladan, taktik yadroviy quroldan foydalanish imkoniyatini qoʻllash zarurligini bayon qildi.