Ukraina bosh prokurori ofisida tintuv oʻtkazildi
Ukraina Korrupsiyaga qarshi milliy byurosi (KQMB) va Korrupsiyaga qarshi ixtisoslashtirilgan prokuratura (KQIP) mamlakat bosh prokurori ofisida tintuv oʻtkazdi. Tergov firibgarlik koll-markazlari tarmogʻiga «homiylik» qilish va mol-mulkni legallashtirishda gumonlanayotgan jinoiy guruh faoliyati bilan bogʻliq. Tergov versiyasiga koʻra, guruhga bosh prokuror ofisi xodimi rahbarlik qilgan boʻlishi mumkin.
Ukraina bosh prokurori ofisida tintuv oʻtkazildi
KQMB va KQIP 4-sentabr kuni «firibgarlik koll-markazlari tarmogʻiga homiylik qilish va mol-mulkni legallashtirishga aloqador jinoiy tashkilotni fosh etish» boʻyicha operatsiya olib borilayotganini maʼlum qildi. Korrupsiyaga qarshi organlar tergov versiyasiga koʻra, ushbu jinoiy tashkilotga Ukraina bosh prokurori ofisi xodimi rahbarlik qilganini bildirdi.
Operatsiyaning batafsil tafsilotlari keyinroq eʼlon qilinishi aytilgan. Shu kuni KQMB va KQIP xodimlari Bosh prokuror ofisida tintuv oʻtkazgan.
Bosh prokuror ofisi tergov harakatlari amalga oshirilganini tasdiqladi. Shu bilan birga, KQMB va KQIPning gumonlari bevosita Ukraina bosh prokurori Ruslan Kravchenkoga taalluqli emasligi taʼkidlandi.
Bosh prokuror ofisi korrupsiyaga qarshi organlarga qonun doirasida toʻliq koʻmak va zarur maʼlumotlarni taqdim etishini bildirdi.
Shuningdek, noqonuniy faoliyatga ehtimoliy aloqadorligi tekshirilayotgan prokuratura xodimi sudgacha tergov davomida xizmat vazifalarini bajarishdan chetlashtirilishi maʼlum qilindi.
«Ukrainskaya pravda» manbalariga koʻra, KQMB va KQIP Ukraina bosh prokurori ofisi Xalqaro-huquqiy hamkorlik departamenti boshligʻi oʻrinbosari Sergey Kropivani gumon qilmoqda.
Nashr oʻz manbalariga tayanib, Kropiva qoʻlga olinganini ham xabar qildi. Biroq bu maʼlumot rasmiy idoralar tomonidan hozircha tasdiqlangani yoʻq.
OAV maʼlumotiga koʻra, Odessa viloyati harbiy maʼmuriyati rahbari Oleg Kiper bilan bogʻliq joylarda ham tintuv oʻtkazilgan.
Kiper avval Ukraina bosh prokurori ofisida turli lavozimlarda ishlagan, 2023-yilda esa Odessa viloyati harbiy maʼmuriyati rahbari etib tayinlangan.
Kropiva ham Bosh prokuraturadagi hozirgi lavozimiga tayinlanishidan oldin Odessa viloyati harbiy maʼmuriyatida Kiperning oʻrinbosari boʻlib ishlagan. U bundan avval bosh prokuror ofisida kiberxavfsizlik yoʻnalishida ham faoliyat yuritgan.
Ayni paytda tintuvlar aynan qaysi mansabdorlarga nisbatan oʻtkazilgani va kimlar rasman gumonlanuvchi maqomini olgani haqida toʻliq rasmiy maʼlumot berilmagan.