Uchko‘prikda ovqatdan zaharlanganlar soni 60 nafarga yaqinlashdi
Og‘ir va reanimatsion bemorlar yo‘q. Holat yuzasidan epidemiologik surishtiruv ishlari davom etmoqda
Uchko‘prikda ovqatdan zaharlanganlar soni 60 nafarga yaqinlashdi
Uchko‘prik tumanida ovqatdan zaharlanishda gumon qilinganlar soni 57 nafarga yetdi. Bu haqda Oziq-ovqat xavfsizligi qo‘mitasi xabar berdi.
2026 yil 17–18-sentyabr kunlari Farg‘ona viloyatining Uchko‘prik tumanida yashovchi fuqarolar holsizlik, ko‘ngil aynishi va ich ketishi kabi shikoyatlar bilan tuman tibbiyot birlashmasiga murojaat qilgan.
Soat 20:00 holatiga ko‘ra, 57 nafar fuqaro tibbiy yordam so‘rab murojaat qilgan va shifoxonaga yotqizilgan.
Eslatib o‘tamiz, dastlabki epidemiologik surishtiruv davomida murojaat qilgan fuqarolar Uchko‘prik tumani Navro‘zshoh ko‘chasida joylashgan fast-fud mahsulotlari tayyorlaydigan shoxobchalardan birida xot-dog va non-burger kabi mahsulotlarni iste’mol qilgani aniqlangan.
Shifokorlar bemorlarda ovqatdan zaharlanish holatiga gumon qilgan. Og‘ir va reanimatsion bemorlar yo‘q.
Holat bo‘yicha epidemiologik surishtiruv ishlari davom etmoqda.