«Tyulenning dahshati» ekologik fototanlovning bosh sovrinini oldi
Norvegiyalik yovvoyi tabiat fotografi Audun Rikardsenning «Tyulenning dahshati» surati Our Nature Environmental Photo & Video Awards 2026 tanlovida bosh sovringa sazovor boʻldi. Suv ostidan olingan kadrda oq ayiq Arktika muzlaridagi ochiq joydan kameraga toʻgʻri qarab turgani aks etgan.
«Tyulenning dahshati» ekologik fototanlovning bosh sovrinini qoʻlga kiritdi
Tanlov tabiat hamda insonning atrof-muhit bilan munosabatlarini yorituvchi foto va video hikoyalarga bagʻishlangan. Bu yil sovringa sazovor boʻlgan ishlar orasida hayvonlarni qutqarish, tungi oʻrmon hayoti va qayta tiklanuvchi energiya mavzularidagi suratlar ham bor.
Belgiyalik hujjatli fotograf Alen Shreder «Orangutanlarni qutqarish» turkumi uchun eng yaxshi fotohikoya mukofotiga sazovor boʻldi. Indoneziyaning Sumatra orolida olingan suratlarda tabiiy yashash muhitining yoʻqolishi, odamlar bilan toʻqnashuvlar va yovvoyi hayvonlarning noqonuniy savdosidan jabrlangan orangutanlarga yordam berish jarayoni aks etgan.
Turkumda shoshilinch yordam, veterinariya muolajalari, reabilitatsiya va hayvonlarni yovvoyi tabiatga qaytarishga tayyorlash bosqichlari tasvirlangan. Suratlar bu jarayonning murakkabligini va tabiatni muhofaza qiluvchi mutaxassislar mehnatini koʻrsatadi.
«Sof tabiat - havo» yoʻnalishida Yan Pokludaning qizilishton va uning polaponi tasvirlangan surati gʻolib boʻldi. Qush keksa eman kovagidagi bolasiga ozuqa olib qaytgan lahza suratga olingan. Uyaning odatdagidan past joylashgani fotografga bu manzarani kamyob rakursdan tasvirlash imkonini bergan.
«Karpat havzasi» yoʻnalishida Imre Potoning tungi oʻrmon surati eʼtirof etildi. Fotograf 108 soniyalik uzoq ekspozitsiya yordamida oy yoritgan oʻrmon fonida kapalaklar parvozining yorugʻ izlarini aks ettirgan.