Trinasolar «Sarimay» FES uchun 184 mingta modul yetkazib berdi
Xorazm viloyatida quvvati 126 MVt boʻlgan quyosh fotoelektr stantsiyasi toʻliq ishga tushirildi va yagona energetika tizimiga energiya yetkazib berishni boshladi.
Trinasolar «Sarimay» FES uchun 184 mingta modul yetkazib berdi
Trinasolar kompaniyasi Oʻzbekistonning Xorazm viloyatidagi quvvati 126 MVt boʻlgan «Sarimay» FES uchun quvvati 695 Vt boʻlgan 184 328 ta Vertex N quyosh modullarini yetkazib berganini maʼlum qildi. Elektr stantsiyasi allaqachon toʻliq foydalanishga topshirilgan va qayta tiklanuvchi manbalardan olinadigan elektr energiyasini mamlakatning yagona energetika tizimiga uzatmoqda.
«Sarimay» FES qurilishi 2024 yil may oyida boshlangan edi. Stantsiya ishga tushirish-sozlash ishlari toʻliq yakunlanishidan oldin, 2025 yil noyabr oyida dastlabki megavatt-soatlarni ishlab chiqardi.
Obʼyektni milliy energetika tizimiga ulash uchun uch kilometr uzunlikdagi elektr uzatish tarmogʻi qurildi. U ishlab chiqarilgan elektr energiyasini «Oʻzbekiston milliy elektr tarmoqlari» AJga uzatishni taʼminlaydi.
«Sarimay» FES maydoni taxminan 180 gektarni tashkil etadi. Stantsiya yiliga taxminan 252 GVt·soat elektr energiyasi ishlab chiqarishi kutilmoqda, bu esa qariyb 60 ming aholining isteʼmoli uchun yetarlidir. Kompaniya baholashiga koʻra, obʼyektning ishlashi har yili karbonat angidrid chiqindilarini 140 ming tonnadan koʻproqqa kamaytirish imkonini beradi.
Stantsiyada quvvati 695 Vt boʻlgan Trinasolar Vertex N NEG21C.20 modullari oʻrnatilgan. Ularda i-TOPCon texnologiyasiga asoslangan n-turdagi quyosh elementlari, shuningdek, modulning har ikki tomoni bilan elektr energiyasi ishlab chiqarish imkonini beruvchi ikki tomonlama konstruktsiya qoʻllanilgan.
Trinasolar taʼkidlashicha, modullarning parametrlari quruq kontinental iqlim sharoitida, jumladan, yozgi yuqori harorat, sezilarli mavsumiy farqlar hamda qum va chang taʼsirida ishlashga moʻljallangan. Past harorat koeffitsiyenti qizish paytida quvvat yoʻqotilishini kamaytiradi, qum taʼsiriga va potentsial-indutsiyalangan degradatsiyaga chidamlilik esa uskunaning xizmat qilish muddatini uzaytirishga yordam beradi.
Modullarning chiqish quvvatiga 30 yillik kafolat amal qiladi. «Sarimay» FES loyihasi 25 yillik foydalanishga moʻljallangan.
«„Sarimay“ loyihasi Oʻzbekistonning qayta tiklanuvchi energetikani rivojlantirish boʻyicha rejalari qanday qilib ishlayotgan obʼyektlarga aylanayotganini koʻrsatmoqda», — dedi Trinasolar kompaniyasining Janubi-Sharqiy, Janubiy va Markaziy Osiyo boʻyicha guruhi rahbari Elva Van.
Uning soʻzlariga koʻra, modullarning yuqori quvvati, ikki tomonlama generatsiya va uskunalarning uzoq muddatli ishonchliligi stantsiyaning barqaror ishlashini taʼminlashi kerak.
Oʻzbekiston 2030 yilga borib elektr energiyasi ishlab chiqarishda qayta tiklanuvchi manbalar ulushini 40 foizga yetkazishni maqsad qilgan. «Sarimay» FES mamlakatda quyosh va shamol energetikasini rivojlantirish doirasidagi amaldagi loyihalar qatoriga kiradi.
Trinasolar kompaniyasi 1997 yilda tashkil etilgan. Kompaniya yirik elektr stantsiyalari, tijorat va sanoat obʼyektlari, shuningdek, xususiy xonadonlar uchun fotoelektrik modullar, energiya toʻplash tizimlari, trekerlar va intellektual energetika yechimlarini ishlab chiqaradi. Kompaniya maʼlumotlariga koʻra, u 180 dan ortiq mamlakat va mintaqalarda faoliyat yuritadi.