Tramp yirik texnologik va sunʼiy intellekt kompaniyalaridagi millionlab dollarlik aktsiyalar kelishuvlarini oshkor qildi
AQSh prezidenti nomidan Microsoft, Nvidia va SpaceX kabi yirik kompaniyalarning aktsiyalari sotib olingan va sotilgan.
Tramp yirik texnologik va sunʼiy intellekt kompaniyalari ishtirokidagi millionlab dollarlik aktsiyalar savdosini oshkor qildi
AQSh Prezidenti Donald Tramp iyul oyida amalga oshirilgan millionlab dollarlik fond bozori bitimlarini, jumladan, Ilon Maskning SpaceX kompaniyasidan tortib, Microsoft kabi texnologik va sunʼiy intellekt gigantlarigacha boʻlgan kompaniyalardagi ulushlarni oshkor qildi.
Rasmiy hujjatlar shuni koʻrsatadiki, Tramp nomidan 6,5 million dollar (4,8 million funt sterling) va 31 million dollar oraligʻidagi qiymatga ega Microsoft aktsiyalari sotilgan, shuningdek, 165 000 dollardan 400 000 dollargacha boʻlgan xaridlar ham qayd etilgan.
Hujjatga koʻra, 1000 dan ortiq bitimlar davomida Nvidia sunʼiy intellekt firmasi va AQSh Mudofaa vazirligi hamda Immigratsiya va bojxona nazorati (ICE) pudratchisi boʻlgan Palantir dasturiy taʼminot kompaniyasi aktsiyalari sotib olingan va sotilgan.
Oq uy matbuot kotibi Trampning aktsiyalar va obligatsiyalar portfeli uchinchi tomonlar tomonidan mustaqil ravishda boshqarilishini maʼlum qildi.
Matbuot kotibi BBC’ga shunday dedi: "Na Prezident Tramp, na uning oila aʼzolari portfelning qanday investitsiya qilinishi yoki investitsiyalar qachon sotib olinishi yoki sotilishiga yoʻnaltirish, taʼsir oʻtkazish yoki fikr bildirish imkoniyatiga ega emas.
Manfaatlar toʻqnashuvi mavjud emas".
Hujjatda, shuningdek, bir paytlar AQSh Hukumat samaradorligi departamentini boshqargan Mask rahbarlik qiladigan SpaceX raketa, sunʼiy yoʻldosh va sunʼiy intellekt kompaniyasining minglab dollarlik aktsiyalari sotib olingani va sotilgani koʻrsatilgan.
SpaceX oʻz aktsiyalarini iyun oyida AQShda joylashgan Nasdaq fond birjasiga joylashtirgan edi.
Oʻshandan beri uning aktsiyalari narxi koʻtarilib-tushib turdi, iyul va avgust oylarida keskin pasaydi, ammo hozirda u bozordagi debyut narxidan 14 foiz yuqori bahoda sotilmoqda.
Maskning Tesla elektromobil kompaniyasi aktsiyalari ham Tramp nomidan sotib olingan va sotilgan.
Tramp oʻtgan yilning yanvar oyida Oq uyga qaytganidan beri minglab fond bozori bitimlarini ilgari ham ommaviy ravishda oshkor qilgan edi.