Tramp Oydagi biror obyektga o‘z nomini bermoqchi

Tramp Oyda biror obyektga o‘z nomini berish istagida

AQSH prezidenti Donald Tramp Oyda joylashgan obyektlardan biriga o‘z ismini berilishiga umid qilmoqda. Bu haqda “RIA Novosti” xabar berdi.

Tramp Texasdagi koinot markazida Oy obyektlari muhokamasi chog‘ida shunday dedi: “Menga bag‘ishlab ham shunday biror narsaga nomimni berishadi deb umid qilaman”.

AQSH prezidenti “Artemida II” missiyasi qo‘mondoni, amerikalik astronavt Rid Veysman bilan uchrashdi. Tramp Veysmanning saratondan vafot etgan rafiqasi sharafiga Oy kraterlaridan biriga Kerol deb nom berilganini eslatib o‘tdi.

AQSH prezidentining fikricha, Oy xotirani saqlab qoladi. “Bu juda yaxshi variant”, deya xulosa qildi Tramp va o‘zi ham bunday nomlanishga qarshi bo‘lmasligini qo‘shimcha qildi.

Tadbirlar davomida AQSH prezidenti mamlakatda koinot akademiyasini tashkil etish to‘g‘risidagi farmonni imzoladi.

27-avgust kuni Tramp Kanada bilan savdo urushi fonida AQSHning shimoliy chegarasidagi Ontario ko‘li nomini Amerika ko‘li deb o‘zgartirish haqidagi farmonni imzolagan edi. Kanada bosh vaziri Mark Karni bunga javoban bu suv obyekti nomi AQSH va Kanadaning o‘zidan ham oldin paydo bo‘lganini, shu sababli mamlakat eski nomdan foydalanishda davom etishini aytdi.

Tramp, bundan tashqari, Atlantika yoki Tinch okeani nomini ham o‘zgartirish niyati borligini bildirgan. Bungacha AQSH prezidenti Meksika ko‘rfazi nomini Amerika deb o‘zgartirgan edi. Shuningdek, Floridadagi uning mulki yaqinida joylashgan magistral yo‘l va aeroportga Tramp sharafiga qayta nom berilgan. Amaldagi prezidentning ismini Vashingtondagi Kennedi markazi fasadiga qo‘shishga urinish esa muvaffaqiyatsiz tugadi: yozuv o‘rnatilgandan olti oy o‘tib, sud talabi bilan olib tashlandi.